بقلم: (د/محمد محسن)
رغم إن الشوارع مليانة، والكافيهات زحمة، والسوشيال ميديا شغالة ٢٤ ساعة، ناس كتير بقت حاسة بالوحدة……..
شباب و كبار في السن و ستات ورجال وحتى الأطفال.. كلنا بقينا نحس إننا لوحدنا، حتى وإحنا وسط الزحمة…..
الوحدة ما بقتش بس معناها إنك قاعد في أوضة لوحدك، لأ.. بقت إنك مش لاقي حد يسمعك بجد، أو يفهمك من غير ما تشرح كتير، أو يسأل عنك من غير ما تستنى….
بقينا كده لأسباب كتير ممكن تكون ورا إحساس الوحدة الجماعي اللي بنعيشه، منها الاعتماد الزايد على التواصل الإلكتروني بدل الإنساني…….
والحياة السريعة اللي خلت الناس مشغولة طول الوقت و
الخوف من الحكم أو الرفض خلى الناس تبعد عن العلاقات العميقة وغياب الدعم الحقيقي من المجتمع أو الأسرة……
حتى على السوشيال ميديا، الناس بتحاول تبان قوية وسعيدة، وده بيخلي اللي بيحس بالضعف أو التعب يفتكر إن المشكلة فيه هو، فيبعد أكتر……
الوحدة المزمنة مش بس شعور، لكنها بتأثر على الصحة النفسية والجسدية. دراسات قالت إن تأثيرها ممكن يبقى زي التدخين أو أكتر، وبتزود فرص الاكتئاب والقلق وحتى أمراض القلب…….
الحل لازم نرجع نسأل على بعض بجد، مش بس من باب المجاملة ونخصص وقت نقضيه مع الناس اللي بنحبهم بعيد عن الموبايل ونتعلم نسمع لبعض، مش بس نرد……
نطلب المساعدة لما نحتاج، وندعم اللي حوالينا من غير ما يطلبوا……
إحنا بشر، واحتياجنا للتواصل مش رفاهية.. ده جزء من إنسانيتنا. فبدل ما نفضل نحس بالوحدة وسط الزحمة، نبدأ احنا نبادر، نفتح قلبنا، وندور على الناس اللي لسه عايزين يسمعوا، ويفهموا، ويكونوا موجودين…….
