غياب الأب مش نهاية الدنيا، ومش معناه إن ولادِك هيطلعوا ناقصين.
السر كله في “استقرار البيت”… مش في عدد اللي فيه.
الاب وجوده مهم لكن لو لاقدر الله أتوفى او سافر او حتى انفصلتي عنه او موجود فى البيت بس دوره باهت وغير مؤثر هتعملى ايه …
وده تحدى بيواجه امهات كتيير
انتِ قدها
تعالى تساعدك
روتين يومى ثابت
روتين ثابت = أمان.
مواعيد نوم، صلاه ، أكل، مذاكرة ..
لما اليوم يبقى ماشي، الولاد بيمشوا معاه وبيكون عندهم توقع للى هيحصل خلال اليوم وكل اللى هتحتاجيه شويه تشجيع ليهم ..
خلي علاقتك بيهم دافية مش عصبية
كلمة حلوة + حضن يومي = طفل يسمعلك من قلبه.
القرب أهم من السيطرة.
شاركيهم المسؤوليات
مش كل الحمل عليكي.
حتى لو صغيرين… خلي ليهم مهام بسيطة.
ده بيعلمهم يعتمدوا على نفسهم.
مشاركه فى تنظيم وترتيب ، شراء طلبات البيت …
ولو مراهق ياسلام لو يبقى مسئول عن قواعد امان تطبق فى البيت ويباشرها بنفسه زى يتأكد من الغاز والكهرباء والميه وباب الشقه كل يوم قبل النوم …
إوعي تلعبّي دور الأب
إنتِ أم… ودورك كده كفاية.
مش لازم تبقي شديدة زيادة ولا “راجل البيت”.
كوني أم قوية وحنونة… مش نسخة تانية من الأب.
دوري على قدوة راقية ذكوريه في حياتهم
مش لازم أب… ممكن خال، جد، مدرب.
وجود راجل محترم قدامهم بيساعدهم جدًا.
علّمي ولادك يتكلموا عن مشاعرهم
“زعلان؟ خايف؟ مضايق؟ قولّي.”
الطفل اللي بيعرف يعبّر… بيكون أهدى وأقوى.
ما تدخّليش الولاد في مشاكل الكبار
ولا تشوّهي صورة الأب… حتى لو غايب.
ده بيحمي قلبهم… ومودتهِم ليكي.
اى تعليق سلبى على الاب بيترجموه لشخصهم هما
حافظى على صوره الاب دايما فى نظرهم وافتكرى انك بتتكلمى عن الاب مش الزوج
اهتمي بنفسك قبل كل شيء
أم مرتاحة = بيت مستقر.
وقت لنفسك مش رفاهية… ده أساس التربية.
وجود اب فاهم وعارف دوره فى حياه أولاده مهم
بس لو مش موجود او موجود ومش بيقوم بدوره
يبقه انتى محتاجه تقرى البوست من الأول
اللي بيربّي هو “الاستقرار + الحب + ووعي الأم”.
وإنتِ تقدري…
صدقينى إنتِ مش ناقصة…
وأولادِك مش ناقصين…
البيت اللي فيه حب ووعي.. بيت بيطمن وبيربى انسان سوى …
البيت اللى فيه حب ووعى .. أقوى من بيت فيه أب حاضر بجسمه… غايب بروحه.
دمتى ام قريبه مش مثاليه
