كتبت/ابتسام كامل
الحفاظ على طيبة القلب وسط الأذى النفسي مش ضعف، بالعكس ده قوة حقيقية.
بس القوة دي محتاجة وعي وحدود واضحة علشان ما تتحولش لاستنزاف.
ودي بعض الحاجات تساعدك تحافظ على نقاء قلبك بدون ما تخسر نفسك:
** افصل بين طيبتك وسذاجتك
خليك طيب بس مش لازم تكون سهل الاستغلال. حب الخير للناس، بس افهم إن مش كل الناس تستاهل تكون قريب منهم.
**حط حدود واضحة
مش معنى إنك شخص طيب إنك لازم تتحمل الإساءة. لما حد يتعدى حدوده، واجهه، ولو تطلب الأمر، خليه بعيد عنك. سلامك النفسي أولى.
** اتعلم التجاهل الذكي
مش كل كلمة تتقال ليك تستاهل رد، ومش كل تصرف سلبي محتاج منك تفسير. أحيانًا أفضل رد هو إنك تتجاهل وتكمل حياتك براحتك.
** سامح بس ما تنساش الدرس
المسامحة مش ضعف، لكنها مش معناها إنك تدي فرصة تانية لنفس الشخص يوجعك بنفس الطريقة. سامح، بس خليك واعي ومتكررهاش.
** اهتم بنفسك الأول
طيبة القلب تبدأ من قلبك نفسه، فخليه مليان حب ليك قبل أي حد. لما تكون مرتاح مع نفسك، مش هتسمح لحد يكسر طاقتك بسهولة.
** مش كل الناس زيك
توقع إن في ناس نيتها مش نقية، ده مش معناه تبقى شكاك، لكن يعني متكونش متفاجئ لما حد يخذلك. كده هتتعامل مع الأمور بهدوء أكتر.
** الخير بيرجع لك في الآخر
حتى لو الناس اللي آذوك ما دفعوش التمن دلوقتي، ربنا شايف وبيعوضك بطريقته. خليك طيب، بس خلي عندك حكمة تحميك من الأذى.
في النهاية، الطيبة مش مشكلة، المشكلة لما تبقى طيب مع ناس ما تستحقش خليك زي البحر، هادي وعميق، لكن وقت اللزوم بيعرف يحط حدوده.
