إنك تكون شخص مؤثر و تسيب علامة عند الأخرين مش محتاج إمكانيات كتير أو شهره أو
فلوس و لا حتى تكون شخص كامل من كل شيء بس لازم تكون صافي النيه و بسيط ، مشجع
لغيرك .. و عشان احنا في حياتنا اليومية بتعدي علينا ناس كتير في الشغل ، والشارع و أماكن
كتير و بنأثر و بنتأثر ف لازم نسيب ورانا أثر طيب الناس تفتكرنا بيه .
يمكن أبسامتك ورا إيجابيتك أو تخفيف عن حمل كبير عن حد .. أو يمكن موقف صغير منك
يفضل معلم مع حد سنين طويله .. كل الحاجات البسيطه اللي بنستهون بيها دي بتكون لها
تأثير كبير في حياة غيرنا و بتفرق معاهم من غير ما احنا نحس ..وبنفتكر ان أغلب التأثيرات
اللي في حياة الناس لازم تكون كبيره و متشافه ..
إيجابية التأثير مش معناها إنك شخص مثالير.. كلنا بنغلط و بتعدي علينا لحظات صعبه ..
لكن الفرق الحقيقي بيكون أختيارك … هل اللي هتعمله هيكون له تأثير كبير ..ولا انت
موجود بس و لكن تأثيرك سلبي أو معدوم ، بنظرية عايش و بس ..
فيه ناس وجودها أمان و مريح حتي لو مش بتعمل حاجه كبيره تقول بيها انا أهو ..كفايه
انه مش مزود الحمول ..
وناس تانيه بتدخل حياتنا بتسبب توتر و خنقه و كلام جارح و طاقة سلبيه و ضعط مالوش
لازمه و لو مكانوش موجودين يكون أفضل ..و لو عرفوا انهم لو سكتوا بدل ما يجرحوا أو
يعدوا بدل ما يكبروا المشكله و يرحموا بدل ما يقسوا دي أكبر تأثير ممكن يعملوه من غير
مجهود و ان ده شكل من اشكال التأثير الإييجابي و يمكن أقوى .. لأنهم مش مطلوب منهم
غير كده .. دفعه تشجيع بسيطه تمشي يومنا ..
يمكن الناس مش عارفه أثر كلمه قالوها سواء مدح أو ذم كانت ايه ، أو موقف حصل و عدى
عادي بالنسيه لهم ..لكن بالنسبه لحد تاني كانت نقطه فارقه ..
انك تكون انسان مؤثر شيء جميل و عظيم و احيانا بيخليك في موضع مسئولية عشان
اللي حواليك دايما شايفينك ” بطل ” أو المنطقه الأمان بالنسبه لهم بسبب وجودك و تأثيرك
الإيجابي حواليهم ..
الموضوع مش بيتحسب بعدد الناس اللي عرفناهم و لا عدد المواقف اللي عملناها ، احنا
بنتحاسب علي الأثر اللي سيبناه .. و انك سبب في ان حد يكمل يومه او سبب انه يكره يومه
من غير ما تقصد او من غير ما تعرف .. عشان كده كل مره هتتكلم فيها او هتتصرف
افتكر ان الشخص الي قدامك زي الصفحه الفاضيه .. انسان شايل حاجات انت مش شايفها
ممكن كلمه منك تبقي زياده عليه أو نجاه ليه ..التأثير الإيجابي مسئوليه انك تكون رحيم
فيه عالم قاسي أو مؤثر في عالم مليان فوضى ..
في النهايه مش هيفتكروا انت مين و لا كان معاك ايه ..هيفتكروا بس احساسهم كان ايه
لما كنت حواليهم ..
