كلمة “عنوسة” دي “فزاعة” قديمة.. اخترعوها زمان عشانك يبيعوا بيها “بواقي” الجوازات اللي محدش عايزها.
فكرة “ضل راجل ولا ضل حيطة” دي ماتت وشبعت موت؛ الحيطة دلوقتي بقت أأمن بكتير.. على الأقل الحيطة مش هتقلب عليكي، ومش هتقولك “انتي نكدية”، ومش هتخونك شاتينج مع واحدة اسمها “سوسو الدلوعة”.
عايز أقول للأهل إللي بيضغطوا على بناتهم:
لازم تحترموا قرارها إنها متدخلش بيت “عيل” لسه محتاج يتربى، ولا “بخيل” بيحسب عليها اللقمة، ولا “نرجسي” بيغذّي عقده عليها.
الوحدة قاسية؟ جايز..
بس القسوة الحقيقية إنك تكوني في بيت واحد مع بني آدم، وبينكم مسافات قد اللي بين الأرض والسما؛ إنك تنامي جنب حد “غريب” وتضطري تترجمي له مشاعرك عشان يفهمها.. وبرضه مش هيفهم!
عشان نكون منصفين.. الجواز “الصح” نعمة، ومحدش عاقل يكره “الونس الحلال” بس لو كان مع حد “ابن حلال” وشبعان ويصون العيش والملح.
وده النوع اللي يستاهل إننا نستناه، ونفرز عشانه، وندفع تمن الانتظار من عمرنا.. عشان لما ييجي، بيعوض عن كل اللي فات.
فيا بخت من بات “وحيد” مرتاح البال، ولا بات “متجوز” حد بيسرق عمره كل يوم.
تأخير الجواز.. أحسن مليون مرة من إنك تتجوزي واحد يخليكي “تكلمي نفسك” وأنتي بتطبخي!
أحسن ما تصحي كل يوم الصبح تلاقي “غلطة عمرك” نايمة جنبك على المخدة ومضطرة تكملي!
تأخير الجواز “قرار”.. لكن الجواز الغلط “انتحار”.
