حتى لو الدنيا كلها وقفت قصادك الناحية التانية.
حتى لو سامع صوت عالي بيقولك “مفيش فايدة”
خليك إنت اللي بيهمس لنفسه “في أمل”
أكيد مش سهل إنك تبقى في النور طول الوقت،
وفي أيام بتبقى ضباب… تقييييلة
وفي لحظات تحس فيها إنك جوه نفق طويل ضلمة ،
غرقان فى مشاكل
والمشاكل محتاجه قرارات
والقرارات هتكلفك سلامك مع اللى حواليك
وممكن يحصل نفور منك وكل حاجه تتهز
بس اوعاك تتهز ..قاوم ..
انت في الصف الصح.
انت اللى ماسك الكشاف بتنور بيه النفق ليك انت واللى فى رقبتك
صف النور منطقة راحة ..
دايمًا نضيف
صف النور يعنى تختار
الصح من وسط الغلط
اللين وسط الشدة
والصبر وسط الإستعجال
والحكمة وسط الاندفاع
والدعاء وسط العجز،
خليك في صف النور
ماشى مع ربنا حتى لو الطريق مُوحش،
يعنى تقول “الحمد لله” وانت مش فاهم ليه بيحصل كده،
يعنى تختار تسمع وتَتَفهم بدل التوبيخ..
وتبدل الخوف بالآمان
هتمشي شوية لوحدك
وهتحس إنك بتعافر لوحدك،
بس صدقني…
خطواتك هتبان نور
للي تايه ورا… وماشي وراك.
خليك دايمًا في صف النور
ولما تحتار، ولما تتلخبط، ولما الدنيا تعتم ..
صدق احساسك وإمشى وراه
مساكم جوا القلب راحة
مساء النور 
S𝓪𝓶𝓪𝓻 𝓨𝓸𝓾𝓼𝓼𝓮𝓯
S𝓪𝓶𝓪𝓻 𝓨𝓸𝓾𝓼𝓼𝓮𝓯
