فيه ناس لما تشوف الغلبان ساكت، تفتكر إن الطريق مفتوح علشان تظلمه……..
تأكل حقه، وتضيق عليه، وتفترى عليه، وتستغل احتياجه، وكأن الفقر سحب من الإنسان كرامته وحقه في الحياة…….
لكن الحقيقة إن الغلبان ممكن يسكت علشان مكسور، أو علشان مش عايز يدخل في مشاكل، أو علشان مش قادر يجيب حقه بإيده……….
……..إنما فيه رب فوق كل البشر، لا بيغفل ولا بينسى……..
إوعى تفرح بلقمة أخدتها من محتاج، أو فلوس دخلت جيبك ظلم، أو حق إنسان ضعيف قدرت عليه لأن مفيش وراه حد.
الحرام مش بس إنك تسرق فلوس واحد………
الحرام كمان إنك تمنع عنه حقه، أو تستغل فقره، أو تضيّق عليه في رزقه، أو تظلمه في شغله، أو تفترى عليه بكلمة تبوظ سمعته وحياته………
وأصعب حاجة إنك تكون عارف إن الإنسان اللي قدامك مش قادر يدافع عن نفسه، ومع ذلك تختار إنك تكسره……….
………..دي مش قوة.. دي قسوة………………
………..مش شطارة.. ده ظلم…………………
……مش مكسب.. ده دين في رقبتك…….
يمكن الغلبان ما يعرفش يرد عليك، ويمكن ما يقدرش يجيب محامي، ويمكن ما عندوش علاقات ولا نفوذ.. لكن عنده رب العالمين……..
ودعوة المظلوم مش محتاجة واسطة، ولا ختم، ولا فلوس، ولا مواعيد……….
واللي يفتري على الناس علشان يوقعهم، أو يقطع رزقهم، أو يشوه سمعتهم، لازم يعرف إن الدنيا دوارة…….
والكرسي مش دايم، والقوة مش بتفضل لصاحبها، والناس اللي النهارده تحت إيدك ممكن تحتاجهم بكرة…….
خاف على لقمتك من الحرام، وخاف على بيتك من مال جاي من وجع إنسان………
لأنك ممكن تشتري بالأموال الحرام أكل ولبس وبيت، لكنك مش هتقدر تشتري راحة البال، ولا بركة الرزق، ولا تشتري رضا ربنا………….
……..لو مش قادر تساعد الغلبان، ما تظلموش………
….لو مش هتفتح له باب رزق، ما تقفلش عليه أبواب رزقه……
……..لو مش هتدافع عنه، ما تفتريش عليه………….
ولو مش هتقدر تجبر خاطره، على الأقل ما تكسرش خاطره.
الناس ممكن تنسى ظلمك.. لكن المظلوم عمره ما ينسى الوجع اللي سببته له………
كل واحد فينا هيمشي من الدنيا، وهيفضل وراه اسمه وسيرته وأثره فإما تسيب وراك دعوة من قلب غلبان بيقول: ربنا يكرمه زي ما كرمني……….
أو تسيب وراك آهة مظلوم بيقول: حسبي الله ونعم الوكيل.
والاختيار في إيدك……….
“ما تستقواش على غلبان.. يمكن أنت شايفه مكسور، وربنا شايفه مظلوم، وبين المكسور ورب العالمين باب لا يغلق.”
