احنا حاليا بنعيش في زمن كله رتوش و تجميل .. كل الصور متعدله و محطوط لها
فلتر ، الكلام متظبط بزياده و أداء الناس بقى مصطنع .. كله مصطنع لدرجه انك
مش عارف الحقيقي من المزيف .. و الحقيقه بقت حاجه نادره ..
الغريب ان الموضوع موقفش عند رتوش في صور و بس دا بدأ يوصل للناس.
الناس بقت مصطنعه و بقت تحط رتوش علي كلامها و مشاعرها .. كله لازم
يتظبط ويتعدل قبل ما يطلع .. “بني أدم حقيقي ” بقى من النوادر .. انك تشوف
وتسمع صدق مشاعر الشخص بقى شبه معدوم ..
و أنا هنا مبقصدش ان الناس بقت كدابه ، بس بقت خايفه تبان علي حقيقتها ..
متخيلين ان صدقهم هو ضعف و التأثر بالأشياء حساسية زياده عن اللزوم ،
ف لازم يبقوا بصوره معينه .. صوره مثاليه خياليه عندهم هم بس ..
ف بيقعدوا يظبطوا و يعدلوا في أداءهم عشان يعجبوا الناس .. بين الفتره و التانيه
بيتحولوا لمسوخ ..أشباه ناس تقريبا . كل ده عشان بس الناس تصدقهم.
انا ما أنكرش ان الرتوش بتجمل و بتحسن و بتخلي كل حاجه أحلى .. بس دايما
الأحساس بيها بيكون أقل .. بمعنى انك لو جيت خدت صوره ليك و فلترتها
هتفرح بيها بس عشان الناس عارفه شكلك و حقيقتك مش هيحسوا بالصوره
لأنك مهما داريت هي متفلتره .. احساسهم بيها هيبطل يبهرهم .
مع الوقت بيعرف الانسان ان مجهوده في التجميل و التعديل كبير ، و تقريبا
هيتعب في استمراريته في تحسين شكله و كلامه و أداءه قدام الناس..
لأن وقتها الانسان بيبقى أتغير و تقريبا هو نفسه تاه مش عارف هو مين ..
لا عارف يبقى نسخته القديمه .. و لا عارف يتقن تمثيل وتعديل النسخه
الجديده .. متمرجح بين هويتين ..ناسي تماما إن أحلى حاجه في الانسان
هي حقيقته ..بعيوبه و تناقضاته ، و كل لحظاته اللي بيبقى فيها علي طبيعته
بتزيد عفويته و جماله ..
الانسان مش الصوره المثاليه و لا المتعدله و لا النسخه المتكافأه من نفسه
لكن الانسان هو اللحظه اللي بيضحك فيها من قلبه و اللي عادي بيعترف فيها
انه تعبان .. اللي بيبقى علي طبيعته مش خايف من رأي حد ..
مش غلط انك تحسن من نفسك ، لكن الغلط انك تعيش حياه مش بتاعتك أو
تعيش دور مش دورك .. سيب نفسك تبان للناس ، يمكن أجمل نسخه منك
هي اللي من غير أي تعديل ..
لأن الكمال مش هيخليك تاخد أوسكار أحسن انسان و لا هتبقى نمره واحد
في حياه الناس .. هتوه من نفسك و هتعرف انك فقدت في الاخر هويتك
الأولى كإنسان و هتفقد مصدقيتك لان النسخه الجديده الناس متأكده أنها
مش انت .. الدنيا من غير رتوش أحلى .. أصدق
