ربنا جعل الأرض تحت رجلينا
عشان نمشي عليها مش عشان نشيلها فوق راسنا
إحنا بس اللى بننسى إننا بشر وفاكرين نفسنا كائنات خارقة
وإن الحِمل لما يزيد لازم نتعامل معاه ببطولة ..
فتتعامل مع روحك بقسوة بإنك تشيلها الشيلة كلها
فتبقى زى عيل صغير شايل شنطة سفر أكبر منه
وبيحاول يطلع بيها فوق سلالم
مافيهاش حتى طرابزين يِسند عليه ..
عمال يملاها كلام سلبى وخذلان
مسؤليه و تعب ..
كل حاجه عمالة تتقل الشنطه وانت بتجر فيها مش قادر ترفعها لحد ماتنحنى من الهم .
ارمي حمولك على الله يا عزيزى
دي أعلى درجات الفهم
وأصدق لحظة إيمان.
اعترف انك مش أد الحِمل، وقول يارب ساعدنى انا مش قادر بس انت قادر
هتحصل حاجة غريبة…
كأن حجر كان على صدرك
حد مد إيده شاله بهدوء وبرحمة.
ماتحفرش طريقك ادعى ربنا يمهدهولك..
وتمشى عليه خفيف من غير حِمل
ندعى اننا نلاقى مكان نعدي منه… مش نعيش جواه مسجونين بمخاوفنا.”
افرد ضهرك، وخد نفس
وقول لنفسك:
“أنا مش جبل
أنا ربنا خلقنى ( عَبد ) له رب بيشيل ويحن ويرحم ويبدل الهم بالسكينة ، ويبتلى ويرفع البلاء ويعوض الصابرين خير
ارفع عن قلبك وخف على روحك وإرمى حمولك على الله
ودوس عالأرض
وإوعى تنسى: تقول
اللهم إني وكلتك أمري… فكن لي خير وكيل
