مفيش حاجه اسمها صح مطلق و غلط مطلق في كل الظروف .. ساعات نسبية الصح و الغلط
بتتغير حسب وجهة نظرنا للموضوع . يعني مثلا نفس الشيء ممكن يبقى صح في موقف و
ممكن يبقي غلط في موقف تاني .
الصح و الغلط زي الشمس حقيقه مطلقه محدش يقدر ينكرها .. وقت الغروب نورها مش
كامل و مش ضلمة كامله درجات كده بين الأتنين .. بس خلي بالك ان نسبية الصح و الغلط
مش معناها ان كل حاجه بتمشي و خلاص بالبركة . فيه دايما خطوط عريضه فاصله و قاطعه
البشريه كلها متفقه عليها زي : القتل، السرقة ، الظلم كل دول حاجات بتفضل غلط مهما
نحورها و نلف و ندور عشان نغير حقيقتها .
و في ناس كتير بتستخدم نسبية الصح و الغلط كنوع من الشماعات اللي بتبرر بيها اي تصرف
يعني ممكن الكدب يبقي نافع أو ينقذ حد من مشكله .. مع أن الكدب كدب غلط مبيتغيرش بس
بيبقى حلال .. كدب مدروس بعناية ..
بدل ما نقول ” انت غلط ” بقينا نقول ” يمكن انت شايف الموضوع بشكل تاني ” مع اننا
عارفين الصح و الغلط كويس أوي .. بس ده مش معناه ان كل واحد يعمل اللي يعجبه
و يقول : ” اصلها وجهات نظر ” فيه خطوط حمرا متفق عليها .. الأذى المتعمد ده
مش نسبي .. ولا استغلال الناس مش نسبي برضه ..كلنا بنبقى ابطال قصتنا و عندنا
مبرر لأي موقف و عندنا مبررات منطقيه جوه دماغنا .. لكن دايما الحقيقه مختلفه.
و عشان كل حاجه ليها عيب و ليها ميزه أحب أقولك أن نسبية الصح و الغلط ليهم ميزه ..
بتخلينا نفكر أكتر قبل ما نحكم علي حد أو علي موقف .. بنقف و نفكر الشخص ده ليه
عمل كده؟ و ايه الظروف اللي خلت الموضوع ده يحصل ؟ أوقات كتير الإجابه بتفتح
عنينا و بنلاقي نفسنا بنبص للأمور من زاوية ضيقه ..
نسبية الصح و الغلط بتعلمنا إن الدنيا مش أبيض و أسود بس و الناس مش كلهم أشرار
ولا كلهم طيبين .. في كل موقف فيه دايما زاوية مش متشافه و كل شخص بيشوف من
منظوره هو و عشان نوصل للوعي ده هنعدي بمواقف كتير أوي عشان نقدر نهضم
و نفهم نسبية الصح و الغلط ..
وعشان مفيش قاعده ثابته لكل حاجه في الدنيا اللي احنا عايشين فيها .. تقريبا ضميرنا
و وعينا هما الحكم في المواضيع كلها .. عقلنا هو المرجع الأساسي لأن الصح و الغلط
مش أجابه واحده . أحيانا السؤال نفسه هم المهم مش النتيجه ..
في النهايه لازم نعرف ان المشكله مش ان الصح نسبي و الغلط نسبي المشكله الوحيده
اننا بندي لنفسنا الحق و كأننا احنا بس اللي صح و الناس كلها غلط ..
بنحكم علب الناس من موقف أو لقطه واحده.. وقت غضب .. ذلة لسان ..
مع ان الحقيقه الكامله مستخبيه و ناقصه مش دايما يعني قدامنا .. الدنيا مش محكمه طول
الوقت .. و مش كل موقف محتاج حكم نهائي .. أوقات بنبقي محتاجين اننا نوسع عقلنا
و قلبنا و ندي فرصه بس نفهم ..عشان الصح الحقيقي مش أنك تكسب جدال و تثبت
انك علي حق .. الصح الحقيقي انك تخرج من الموقف من غير ما تظلم حد و لا حتي
تظلم نفسك ..
