كتب : هاني رفعت
إياك يا مصري أن تنسى… خليك فاكر دايمًا إن الإهانة في حق بلدك لا تُغتفر، وإن أي إساءة لأرضك هي إساءة لعرضك، وأي تطاول على شعبك هو انتقاص من قيمتك وكرامتك.
مصر مش مجرد حدود على خريطة، مصر تاريخ عريق، دماء شهداء، وتضحيات رجال وقفوا عبر السنين عشان يفضل الوطن واقف وشامخ. كرامة مصر مش كلام بيتقال ولا شعارات بتترفع، كرامتها من كرامة كل مصري والمساس بيها مساس بينا كلنا.
اللي بيفكر إننا شعب بينسى… لازم يعرف إننا ممكن نعدي ونغفر في حاجات بسيطة، لكن الغدر عمره ما يتنسى، النفاق ملوش عفو، والخيانة جرحها بيفضل مفتوح مهما عدت الأيام.
بلدك هي شرفك، هي عرضك، هي اللي من غيرها مالكش قيمة ولا وجود. عشان كده لا تسمح لحد يقلل منها أو يسيء ليها. إحنا ممكن نختلف جوه البيت الواحد، لكن أول ما ييجي الغريب يطاول أو يجرّح، كلنا بنبقى صف واحد، قلب واحد، وصوت واحد.
علّموا الدنيا إن المصري ممكن ينسى أي شيء… إلا الغدر والخيانة، دول محفورين في الذاكرة وما يتشالوش من القلوب.
زي ما عبرنا قناة السويس في 6 أكتوبر، وانتصرنا على المستحيل، لازم دايمًا نفتكر إن عزيمتنا أقوى من أي خيانة، وصمودنا أعظم من أي نفاق. مصر انتصرت لأنها ما نسيتش دم أولادها ولا غدر عدوها.
وإحنا النهاردة، لازم نفضل فاكرين الدرس: الوطن غالي، والكرامة خط أحمر، ومصر فوق الكل.
