بقلم :محمد حسني محمود
إحنا ساعات بنفتكر إن حلم اليقظة مهرب جميل من الواقع، بس الحقيقة إنه ممكن يكون مصيدة. الحلم وإنت صاحي بيخليك تعيش تفاصيل ملونة وكأنها حقيقة: حوارات، مواقف، نجاحات.. وكل ده إنت البطل الوحيد فيه. بس هنا المشكلة: إنت عايش في عالم مفيهوش حد غيرك، عالم مفصول عن الناس والواقع.عالم افتراضي جميل يشوع نور وبهجه وهي دي الخطوره إنك كل ما تغرق في الحلم، كل ما تبعد عن الحياة الحقيقية. تبدأ تلاقي نفسك مش عايش وجودك الطبيعي بين البشر، مش بتشارك، مش بتتعلم من الآخرين، ومش بتخوض التجارب اللي بتبنيك بجد. الحياة الحقيقية مش مشاهد بتكتبها ولا حوار بتألفه.. الحياة الحقيقية هي احتكاكك بالناس، ضحكهم، زعلهم، مواقفهم اللي ساعات بتعلمك أكتر من ألف حلم. كل ده لازم تشارك في كل اقل شيء حتى في الزعل والغضب والزحمه وقله الادب بس خليك على التربيه والتقاليد والعادات اللي انت اتربيت عليها..حلم اليقظة في الأول بيبان كراحة، بس مع الوقت يسرق منك عمرك. يخليك متعود على وهم، وتبدأ تنسى إن الوجود الطبيعي بتاعك هو اللي بين الناس.. هو اللي هيخلي عندك قصة حقيقية مش بس في خيالك، قصة لها أثر، ولها معنى.
باختصار: الخيال جميل لو بيديك فكرة، لكن لو سيطر عليك هيضمر حياتك. لأن الحقيقة الوحيدة اللي تستاهل تعيشها هي وجودك وسط البشر.. مش في عقل وحدك.
عيش وتعايش وغوص بين البشر هى دة الحياة لأننا في الأصل انسان يعيش وتعايش بالطبيعة بين الناس مهما كان الاخلاق والدين والعرق والعادات والتقاليد
هى ده الحياة
