الحب محور مهم في أغلب العلاقات و يكاد يكون الهدف الأساسي اللي بيخلينا
نقرب من ناس و مشاعرنا بتتحرك تجاهم، وأحيانا بندخل في العلاقات بدون هدف
و بنلاقي نفسنا بعدها بنحب … أنا في رأيي أنجح نوع من أنواع الحب هو الحب
اللي مفيهوش أتفاقات و لا حسابات و لا حدود ..
محدش بيدخل تقريبا في علاقه و هو ناوي يعمل صفقة …. بس كتير بيخرج من
العلاقات و هو حاسس انه كان في اتفاق غير مكتوب ، في الأول كل العلاقات بتبان
بسيطه و عفويه مفيهاش تعقيدات و لا متطلبات ، حد بيهتم عشان بيحب و حد تاني
بيدي من غير ما يسأل ” ياترى هاخد ايه ؟”
لكن مع الوقت بتبدأ أسئلة تظهر : ” انا بعمل كل ده ليه ؟ و هو بيعمل ايه ؟ “
” هل أنا بهتم أكتر و لا ده أحساس بس “
” ليه دايما أنا اللي ببدأ ” و أسئلة كتير من النوع ده ، النوع اللي بيخليك تعيد تفكير
عن عطاءك و مقداره في العلاقه دي ..
من هنا الحب بيبدأ يتحول من مجرد احساس لصفقة تبادل صغيره ، كأن الحب
بقى عرض و طلب أو كفة ميزان و كل واحد بيشوف ايه الكفه الزياده و ازاي
الكفه التانيه لازم تعادلها ..
بس الحقيقه عمر ما الحب كان أرقام أو حسابات أو نقيسه بدرجات أهتمام ، أو عدد
مكالمات أو زيارات و لا مين كلم مين بعدد رسايل أكتر، و لا بالمواقف بس .
لأن كل واحد بيحب بطريقته بفعل أو بكلام أو نوع من الاهتمام ، ف صعب نخلي
اللي قدامنا نسخه مننا و نجرده من طريقته في تعبيره عن حبه لينا .. و نفرض عليه
طريقه عشان يحس نفس احساسنا أو يتصرف بنفس أسلوبنا .. و لو معملش كده
يبقي في نظرنا مقصر، و كل طرف مستني التاني يثبت حبه
و كل تصرف نبدأ نفسره و نديله منطق معين …
ماقدرش أنكر ان المشاعر المتبادله في صوره مقابل بيشبع عند الانسان شعور
انه مرغوب فيه و محبوب بنفس الدرجه اللي عايز يساوي فيها حبه لشخص تاني،
و طبعا مش حل اننا نلغي فكره المقابل تماما ، لأن من الطبيعي ان الانسان يحب
و يتحب ..
لكن الفرق بين الحب الحقيقي و الصفقه هو الهدف أو النيه من الحب ده ..
هل انت بتدي عشان تحب ؟ و لا بتدي عشان تاخد ؟
في الحب الحقيقي انت بتدي لأنك عايز تدي ، مش لأنك كاتب في مخك ليستة
أسباب .. و في نفس الوقت لازم يبقي فيه توازن بينا القيمه و الأحساس ..
و ان كل طرف عارف و حاسس انه متقدر و انه مش بيجري و ينهج لوحده
في العلاقه دي …
أخطر حاجه اننا نحول المشاعر و الأحاسيس لصفقة … نحولها من مساحة
راحة لساحة مقارنه ..” مين عمل أكتر ؟ ” و ” مين أستحمل أكتر ؟”
الحب لما بيدخل في المقارنات بيخسر هدفه و معناه لأنه ببساطه الناس بتحوله
لعقد مكتوب فيه بنود و شروط .. نسيوا انه حاله و راحه و احساس بالأمان من
غير ما تحسب كل خطوه ..
لو لاقيت نفسك بتحسب كل نفس و كل تصرف علي اللي قدامك ، أعرف انك
دخلت في صفقة حب .. صفقه مشروطه ، ممكن تنجح شوية لكن الحب هيكون
انتهي و خرج من حته تانيه .. لأن الحب الحقيقي هو الحاجه اللي مينفعش نقيسها
و لا نحددها ..
