بقلم د./إلهام حسنى
كل يوم نصحى الصبح، ونبدأ نشوف الدنيا بعين قلوبنا.
في ناس قلوبهم حلوة وطيبة، يفرحوا لفرحك ويزعلوا لزعلك، ولو شافوا منك غلطة يعدّوها، كأنهم ما شافوش حاجة.
وفي ناس تانية عندهم عادة غريبة… دايمًا يدوروا على عيوب الناس.
لو عملت خير كتير، هينسوه. ولو غلطت غلطة صغيرة، هيفضلوا يفتكروها ويكلموا عنها في كل مكان.
تفتكر ليه بنضيع وقتنا نعدّ أخطاء بعض؟
ليه ما نتعلمش نسامح، ونفكر إننا إحنا كمان عندنا عيوب؟
كل واحد فينا لو بص في المراية وشاف نفسه كويس، هيعرف إنه مش ملاك، وإنه محتاج يشتغل على نفسه بدل ما يركض وراء عيوب غيره.
الحياة قصيرة جدًا… أقصر مما نتخيل.
مش مستاهلة نزعل ونتخانق ونضيع أيامنا في الغضب والشكوى.
الدنيا محتاجة قلوب صافية تفرح للخير وتدعي للناس بالهداية والستر.
اللي بيشوف عيوب الناس وينسا عيوبه، عمره ما هيرتاح.
لأن اللي يدور على الغلط دايمًا هيلقيه.
لكن اللي يدور على الحلو في قلوب البشر، هيعيش في راحة وسلام.
خلونا نقرر النهارده إننا نصحى ونشكر ربنا على نعمة القلب الطيب.
إننا نختار نسامح أكتر، ونشوف الخير أكتر، وندعي لبعض أكتر.
يمكن تكون دي أجمل هدية نقدّمها لنفسنا واللي حوالينا.
يا رب، طهّر قلوبنا من الغل والكبر، وخلي عيوننا تشوف الجميل وتنسى العيوب.
صباح أو مساءالخير والرضا على قلوبكم.
(بنت الحلم الكبير)
تعليق واحد على “الحياة بسيطة… فلا تعقّدها بعيوب الناس.”
جميل ماشاءالله فعلا واقع بنعيشه يوميا