الوجوه بتتغير، الأسماء بتتبدل، والأماكن مهما كانت مألوفة… بتفقد دفئها مع الوقت.
كل حاجة حوالينا ماشية، بس مش دايم منها غير أثرنا، الكلمة اللي سبناها وخلت حد يفتكرنا بامتنان، أو يمكن يفتكرنا بوجع.
مش مهم الناس تفضل، ولا الظروف تروق،
المهم لما نمشي… نكون سايبين علامة، مش مجرد غياب.
اللي عاشوا قبلنا كانوا بيدوروا على المجد،
اللي بعدهم بيجروا ورا الراحة،
لكن قليلين بس اللي فهموا إن القيمة مش في عدد الإنجازات…
القيمة في لمعة عين إنسان بعد ما يسمعك، في تنهيدة ارتياح خرجت من قلب حد بسببك،
في لحظة صدق خلت حد يصدق في روحه تاني.
مفيش حد بيعيش عمره كله محبوب،
ولا دايم في مكان واحد،
بس في ناس لما تمشي… تسيب فراغ يتعاش،
وفي ناس تمشي… وكأنها ماعدتش.
فكرت يوم إيه اللي هيعيش منك؟
سيرتك؟ طريقتك؟ لمسة حنية؟
ولا مجرد ذكريات عابرة ماحدش عايز يفتكرها؟
ابنِ لنفسك قيمة، مش سيرة.
اصنع لنفسك احترام، مش شهرة.
سيب أثر طيب، ولو بسيط… يمكن يكون هو اللى يرفعك بعد رحيلك.
أنا مش دايم…
لكنّي بحاول أعيش كل لحظة كأنها الأخيرة،
مش خوف… لكن وعي.
وعي إن الحياة مش مضمونة،
وإن الفرصة اللي في إيدي دلوقتي… ممكن تكون ما تتعوضش.
بنت الحلم الكبير
