من بعد سنين قضّيتها في كرب
وليالي كتير أصعب م الصعب
فيه حاجة غريبة بتحصلّي
وسعادة كبيرة فاتت ع القلب
وعيوني النوم بقى مجافيها
والبسمة بتيجي لوحديها
إيه هيّ القصة وإيه فيها
معقول يكون ده اللي اسمه الحب
من بعد سنين قضّيتها في كرب
أيام مرّيت فيها بشدة
وعانيت م الفُرقة وم الوحدة
وهمومي أشكيها ساعات لليل
ونجومه عليا معاه شاهدة
ماخطرش في بالي إن ده يحصل
والقلب يحب ويتحوّل
كان ليه عن قلبي سنين غايب
كان فين الحب ده م الأول
من بعد سنين كنت لحالي
بسهر على جرحي وموّالي
ولا حد بيعرف إيه ظروفي
ولا حد بيسأل كان مالي
بوجوده الحال فجأة إتغيّر
بقى غصبٍ عني بدوب وأسهر
وإن غاب عن عيني ولو لحظة
في غيابه القلب بيتأثّر
تعليق واحد على “ده اللي إسمُه الحب …؟”
رائع وأكثر دام المداد مغداقا