ميرنا وليد اسمها الحقيقي ميرنا وليد المصري الشعراني، وهي أصلاً لبنانية من طرابلس، لكن جدها مصري وليه مقام في باب الشعرية. اتولدت سنة 1977، وحياتها من البداية كانت صعبة، لأنها وهي عندها 4 سنين فقدت والدها قدام عينيها أثناء الحرب الأهلية في لبنان، وده دخلها في حالة اكتئاب شديد.
والدتها خافت عليها، فأدخلتها مدرسة داخلية، وبعد فترة قررت تيجي مصر في الصيف ومعاها ميرنا. ولما وصلوا القاهرة وهي عندها 11 سنة، قررت الأم تستقر هنا، وفعلاً صحتها اتحسنت وبدأت تحب الحياة من جديد.
ميرنا من صغرها كانت بتحب التمثيل، واتعرفت على أحمد زكي اللي دعمها وقدّمها في فيلم “الراعي والنساء”، وبعدها شاركت في مسلسل “ذئاب الجبل” وهي لسه في المدرسة. ومن وقتها بقت مطلوبة في أعمال كتير.
لكن فجأة اختفت من الساحة، والناس بدأت تسأل: فين ميرنا؟! طلعت إشاعات إنها اتحجبت، أو إنها اتجوزت ملياردير منعها من التمثيل.
ميرنا طلعت بعد كده وقالت الحقيقة: إنها قررت تركز على حياتها الزوجية وبيتها. جوزها مش ملياردير زي ما اتقال، هو موظف في شركة طيران، وحياتهم عادية جدًا. عندها بنتين “مريم” و”مايا”، وفلوسهم كلها موجهة ليهم.
وقالت إنها ما بتمثلش علشان الفلوس، لكن علشان تحب الدور وتنجح فيه، وعشان كده لحد دلوقتي ما رجعتش للفن.
في الآخر، حتى لو غابت عن الشاشة، هي شايفة إن نجاحها الحقيقي في بيتها وأسرتها، وده أعظم نجاح
