فينُه اللي غايب عين عيونّا فينُه
باعنا خلاص ولّا إحنا مش واحشينه
لو كان فيه حاجه يعني شغلاه عنّا
عذره معاه وندعي الله يعينُه
بقاله فترة ماقالّناش ولا كلمة
حاسين في بُعده الكون كأنُه ضلمة
لو كان بقى مشغول في حاجه مهمة
فخلاص أكيد إحنا بقى مسامحينُه
فينُه اللي غايب عين عيونّا فينُه
عدّت علينا في بعدُه ياما ساعات
مستنظرين الرد والسلامات
لا بعت سلام ولا جواب منُه
مكتوب فيه حتى ولو تَلَت كِلمات
كلمة تطمّن قلبنا اللي شاريه
وكلمة نعرف هو عامل إيه
ويقولّنا لو كان بقى يرضيه
طول الغياب ما بينّا يعني وبينُه
فينُه اللي غايب عين عيونّا فينُه
طول الغياب كان حالنا فعلاً صعب
حاسين بوحدة وتوهة جوه القلب
طب كان غيابُه عننا بمزاجُه
ولّا غيابُه ماكنش لُه فيه ذنب
إشتاقنا فعلاً يعني نسمع صوتُه
واحشنا همسُه واحشنا حتى سكوتُه
معقول حنانُه إتبدّل بجبروتُه
ولا إحنا يعني باقينا مش عاجبينُه
فينُه اللي غايب عين عيونّا فينُه
بقلمي عبدالحميد وهبه
