كلمات زكيه فيصل
أنا الحيران أنا التايه وعمري بيجري ع الفاضي
أنا اللي عمري ماكنت عن بعدي وغربتي راضي
وهعمل إيه وإيه بإيدي مفيش غير إني أتغرب
وأسيب بلدي وأسيب ناسي وابعد عنكوا ياولادي
وحشتوني ووحشني أتدفي وسطيكم
وبدعي ربي إني أشوفكم وارجع بالسلامه ليكم
وعارف إنكم من غيري ناقصكوا كتير
دا أنا مبنمش الليل من تفكيري وقلقي عليكم
بيحسدوني الناس ! علي إيه يعني بيحسدوني ؟
دا أنا من يوم ماتغربت منشفش الدمع في عيوني
وراح عمري بيفوت يجري وضاعت مني الأيام
ولا يعلم بيا الا الله ياريت في حالي تسبوني
ولو ع الفلوس يعني أنا دافع تمنها كتير
أنا شقيان طالع روحي وشايل هم حمله كبير
بعيد عن اهلي وولادي تملي حزين ودا العادي
ونفسي في راحه مش لاقي أنا تعبان ومش بخير
عيالي محرومين مني وأنا نفسي في ضمتهم
أنا ماشي في طريقي وقلبي هناك في سكتهم
ومتخير بين حضنهم وبين كسوتهم وأكلهم
وغصب عني سبتهم مأنا متغرب علشانهم
ماهي الدنيا بقت صعبه وفي بلدي عايش مخنوق
واصبر وأقول هتتعدل وبكرة تروق
اتاري المسؤليه بتكبر ويوم عن يوم الهم يزيد
فقلت أسافر واتغرب لجل ولادي وهعمل إيه ماانا مخنوق
وزوجتي الغاليه نور عيني حملك زاد أنا عارف
بعيد عنك مسافه وبس لكن قلبي ليكي شايف
ياقايمه بدوري وبدورك ربنا يكون في عونك
أنا روحي سايبها معاكوا وطول الوقت عليكم خايف
الغربه تمنها غالي والله تمنها غالي
متغركوش المظاهر الله أعلم بحالي
الغربه خسارتها أكتر من مكسبها
تعبان منها لكن هصبر عشان عيالي
زكيه فيصل
