بقلم شريف شحاته مصر
يا حامل الورد والفل والريحان معاك عبير الزهور والورد فيه الوان
عايز أشتري منك زهرة تكون نادية أسعد مع عبيرها والورد فيه الحان
إختارلي علي ذوقك والنفس بيك راضية يمكن علي جمالها ترحل بقي الأحزان
أمانة عليك تختار وردة تكون هادية دة الورد لما يميل الأصل فيه بيبان
عبير الأصل فيها والوانها كمان صافية تشفي القلوب بيها مع قلب كان تعبان
وطول رحلتي في الشوك عشناها بالعافية ما لاقينا فيها ورود تسرح مع الغلبان
ولو التمن بالروح وسعر الزهور غالية أدفع أنا بروحي لحظة أكون فرحان
والورد لو دبلان شوف لي زهور تانية ياسمينا أو فلة تقطفها من الأغصان
ولو ورد بلدي عايش وسط جبال عالية أقطفلي منها وردة بدون عنوان
الشوك في زهريتي ومن الورود فاضية لو ليلة فيها ورود أدفع وأنا الكسبان
دة الفرح وسط ورود حتي ولو ثانية يكفينا عطر العود والعطر أصله حنان
والحزن لو موعود فيه النفوس فانية الورد فيها يجود حلاوة الأزمان. وعجبي
