اللي مشاعر قلبي فيه
دايما يا ناس متكلفته.
و موخمة .
وعلى ضفاف القلب
واقفة مرخمة
.لا هي عاوزة تقعد من سكات
ولا تدردش ويا نبضى بفضفضة
نلضم كلام ويا كلام
وفي دفتر العشاق نسجل
باسمها كم ملحمة.!!
فقلت: لازما أرجها .أ
حرك الشوق اللي
راكد جوه منها أفكها..
تكونش فاكرة
عشان شوية شعر شاب
ان الحروف اتكهنت
.اتعفنت وريحتها واصلة للسحاب ؟!!
فمعدش ينفع تترسم جوا الكتاب؟!!
ولو مصرة تتقرا..
تطبع على حسابها التقيل
في العشق حتة ملزمة؟!!
ابدا ورب الكون ميحصل
إني أسلم من سكات..
واسحب لي كرسي في الخلا
واقعد اولول عاللي فات..
ههههه..دالقلب معجون بالحياة
مغموس في شربات المنى
مرشوش بسكر فرحها رغم الأهات.
وناوي يمشي للبداية من جديد
بحبه الوليد
وبطلة الافراح في وقت
ما توهبه العشق الفريد..
يفتح دراعاته الطوال
بالحضن ..
ياخده جوه عمره يهننه
ويطمنه انه معاه
ولا مرة راح يهجر خطاه.
او.. يخذله..
لأنه ببساطة مشاعره اتشد له..
لمسات حنانه ..
على اللي باقي في دنيته
بدفا كفوفها معلمه
فأمر ملزوم بالنفاذ:
نفتح الأبواب ..
ونملص بره طيات اللحاف
نتوضا بعبير الهنا
ونصلي بينا عالنبي
ونبدأ المشوار قصيدة
مجلجله وسط السكات
وحروفها واصلة من للسما.
وعجبي..
