يقولوا إن الطيبة كنز، بس في زمن المصالح والأقنعة، بقت الطيبة نعمة ولا نقمة؟ الحقيقة إن القلب الطيب بقى عملة نادرة، مش لأن الناس بقت وحشة، لكن لأن الدنيا علمتهم يخافوا ويحذروا. صاحب القلب الطيب بيدي من غير حساب، يسامح من غير ما يفكر، ويصدق حتى لو اتوجع ألف مرة، بس للأسف دايماً بيدفع تمن طيبته.
القلوب الطيبة متعرفش الغدر، ولا تعرف تلعب بالأقنعة، بتشعر قبل ما تفكر، وتسامح قبل ما تحاسب. الناس ساعات تفتكر الطيبة ضعف، بس هي في الحقيقة قوة، بس مش أي حد يعرفها. القلب الطيب بينور حياة الناس بحب صادق وابتسامة مخلصة، حتى لو كان هو نفسه موجوع.
المشكلة مش في الطيبة، المشكلة في اللي مش مقدّرها، اللي يستغلها وياخد من غير ما يدي، واللي يجامل بالكلام الحلو بس وقت الجد يختفي، وفي الآخر يسيب جرح في قلب مكنش يستاهل. ورغم كل ده، يفضل القلب الطيب زي ما هو، يمكن يتعلم ياخد باله أكتر، يبقى أذكى، بس عمره ما هيعرف يكون قاسي.
يمكن الأيام تعلمك تكون أهدى، تفكر قبل ما تدي، تحب من يستاهل، وتسحب نفسك من اللي بيتعامل مع طيبتك على إنها فرصة. بس إياك تتغير وتبقى زيهم، خليك طيب، بس بعقل، اسامح، بس بعقل، وادي، بس بحدود. لأن القلب الطيب مش عيب، بس ماينفعش يتبذل في مكان غلط!
نصرا ابراهيم
(أوبرا النوبة )
