كتير مننا بقى بيسعى عشان يكون أفضل نسخه من نفسه ؛ بس السؤال هنا ..أفضل نسخه لمين ؟ و بأي معايير ؟
أحيانا بيحصل للإنسان نوع من أنواع الازدواجية في المعايير و بيقع في حيره ما بين المثاليه و التشويه
و بيحاول يجري ورا صورة الكمال قدام الناس .. يعني نسخه مش بالضروره تكون الأفضل من حيث الإنتاجية أو النجاح بس نسخه أصدق و أفضل أو كان يتمنى تكون كده عشان كل المحيطين بيه تحسسه بالكمال اللي بيبحث عنه …لكن التشويه اللي بيحصل بيكون عباره عن محاولة انه يكون شخص تاني غير طبيعته اللي الناس تعرفها ..و يبدأ الإنسان ده يقيس قيمته بقيم مش شبهه.. و في الحالة دي بيصدر للناس صوره مش شبهه و عشان كده بنسميها نسخه مشوهه ….
لكن النسخه الأفضل أو الأصدق هي الوعي الكامل بحدود الإنسان و احتياجاته و هنا بنلاقي نسخه اكثر مرونه و راحه ؛ لأن الإنسان ساعتها مش محتاج يظهر بشكل مخالف لطبيعته …
فيه ناس بيعيشوا حياتهم صح أوي ..لكن مش بيبقوا ناس حقيقيين ؛ دايما فيه شيء مش صادق أو طبيعي
و فيه ناس أقل كمالا و لكن الأقرب لنسختهم الحقيقيه
و الموضوع بمنتهى البساطه انك مش محتاج تبقي نسخه مثاليه عشان تبقى إنسان الناس تقول عليه كويس
لأن المثاليه هنا شعور بالهروب من نقص معين و الإنسان بيسعى أنه يغطيه بالكمال أو النسخه المثاليه
و الحقيقه ان النقص دا طبيعي جدا و مواجهة النقص ده بيدي الإنسان قبول و إتزان لشخصيته
أفضل نسخه منك هتيجي بالوقت ؛ بعد مراجعة أخطاء و قبول شخصك الداخلي بكل عيوبه
تعتبر إعادة فهم للنفس أكتر .. و ساعتها هتخرج افضل نسخه منك..
