تقريبا كل معرفتنا بالندوب ( أُثار الجروح ) انها بتسيب أثر كبير في الشكل أو الجسم ودي
حاجه تقريبا تخوف ناس كتير، عشان الناس أكيد مهتمه بشكلها و أنها تبان أحلى ..
لكن الحقيقه فيه نوع تاني من الندوب مش بيبان ، مستخبيه لا بتبان في الشكل أو الملامح
ندوب نفسيه ، بتبان في التصرفات و الكلام و حتى ردود الأفعال ..
ندوب أتسببت فيها ناس من وقت طويل .. و عشان عملت أثر كبير و خطير ، تقريبا مش
بتخف ، و محدش عارف يشفى منها ، ندوب من الطفولة و تقريبا الشخص نفسه مبيحاولش
يواجهه نفسه بيها عشان الجرح ده ميبدأش يألم تاني من جديد ..
رد الفعل السريع و الخوف الزياده من كل حاجه و التردد اللي مالوش سبب واضح دي
كلها ندوب جروح نفسيه ، و عشان الانسان مش بس بيتكون من لحظات حلوة .. هو كمان
نتاج حاجات وجعته و سابت فيه علامه .. موقف حصل و اتنسى بس ساب أثر..
كلمة اتقالت في موقف و فضلت محفوره جوا النفوس ..
الندوب دي مش دايما كبيره و واضحه ، ساعات بتبقى حاجات بسيطه و اتكررت لحد ما
بقت جزء من الشخص نفسه .. الخذلان أكتر حاجه ممكن تسبب ندوب و جروح نفسيه ،
الهجر المفاجيء بدون أسباب كمان ممكن يسبب ندوب نفسيه ..و تقريبا الناس بتشوف
بس مش بتشوف السبب ..بتحكم بالظاهر فقط ، يعني ساعات بنشوف حد بارد و هادي
منعرفش هو قاسى من ايه أو الندوب اللي جواه سببها مين ..أو تشوف حد عصبي و انت
متعرفش هو شايل ايه جواه سنين ، لو حتي حد ساكت متعرفش انه اتكلم كتير و محدش
سمعه .
محدش يقدر ينكر ان كل واحد فينا عنده ندوب نفسيه سواء كانت متشافه أو مش باينه
لكن دي حقيقه مينفعش نداريها ، حتي لو بنحاول نخبيها .. بس مش هنقدر نخبيها عن
أكتر ناس بنتعامل معانا .. أزواج أو زوجات .. أولادنا و كل دوايرنا الخاصه اللي
بنتعامل معاهم بشكل مستمر ..
بيبقوا يا اما شايفين ندوبنا و ساكتين ، يا اما مش قادرين يتعاملوا معاها و بيواجهونا
بيها .. و دي الصراحه أشرس أو اكتر مواجه من ناحية الوجع ، لأن أقرب حد ليك
بيبقى شاف العور النفسي ده .. وتقريبا دا أخر شخص علي الكوكب بتبقى حابب
انه يعرف اللي جواك .. خايف من مواجهته مع نفسك و مع الناس اللي حواليك.
الأخطر من الندوب هي موجوده و لا لأ .. ازاي بنتعامل معاها ، لأن فيه ناس كتير
بتستسلم للي جواها و بتسيب الندوب دي تتحكم فيها و في حياتها ، و في ناس تانيه
بتواجهها و تفهم هي ليه وصلت لكده ..
الندوب دي مش كارت ضعف بيتمسك عليك ، لكن هي دليل قوتك ، دليل انك حاربت
و قاومت و وقعت و قمت من تاني .. متخافش انك تبين جروحك و تخبيها أكتر ،
لازم تقاوم كل قرار مبني علي خوف قديم ، و كل خطوة جيت تخطيها و من خوفك
لا اللي جواك يبان وقفت في مكانك متقدمتش ..
متخليش ندوبك النفسيه تسجن أحلامك و تحطم أهدافك ، و تتحكم فيك و في مستقبلك
انت تستحق انك تعيش من غير أي ماضي أو جرح يتحكم فيك ..
الندوب عمرها ما هتختفي تماما ، لكن انت تقدر تخليها مجرد ذكرى مش أساس بيحكم
حياتك … الندوب اللي فيك مش نهاية لقصتك ..
