معلومه علي الماشي

اللي ميعرفوش ….عين شمس….اقراء عن

عين شمس

5 حاجات محدش يعرفها عن منطقتي .. عين شمس

في كل حي في مصر أسرار محدش يعرفها غير ناس قليلين، سواء أسرار تاريخية أو سياسية وحربية أو حتى قصص بين ناسها وأهلها، علشان كده قررنا نطلع الأسرار دي ونشاركها سوا، وقررت ابدأ بنفسي ومنطقتي عين شمس.

تاريخها:

حي عين شمس هو تقريبا الحي الوحيد في مصر اللي اسمه ثابت من ساعة العصر الفرعوني، عين شمس كانت في يوم من الأيام عاصمة مصر الفرعونية، ورغم إنها كانت جزء من العاصمة إلا إنها كانت أهم جزء فيها، وفضلت مهمة لحد عصر الملك فاروق وكانت مليانة قصور لأهم الناس في مصر لحد ما انتهى عصر الملكية في مصر، علشان يبدأ فيها التوسع العمراني اللي موجود لحد دلوقتي.

آثارها:

كل فترة نسمع عن آثار حد لقاها تحت بيته في منطقة عين شمس والمناطق المجاورة ليها، وده طبيعي نظرا لتاريخها الفرعوني، مش بس كده لأ وكمان فيها بعض القصور اللي من أيام مصر الملكية واللي شكلها ساحر لحد النهارده، عين شمس كمان فيها مزرعة خيول ضخمة بناها الملك فاروق وفيها خيول عربية أًصيلة والمزرعة دي عالمية وبتشارك خيولها دايما في المسابقات الدولية وناس كتير تعرفها بس قليلين اللي يعرفوا إنها عالمية ومن أيام الملك كمان.

معركة باسمها:

قليلين كمان اللي يعرفوا إن فيه معركة في تاريخ دخول الإسلام لمصر باسم معركة عين شمس، المعركة دي كانت مهمة جدا في كسر ظهر البيزنطيين وهزيمتهم ودخول الإسلام مش بس في مصر لأ وفي دول الشمال الأفريقي كلها كمان، ورغم إن الحرب استمرت بعد المعركة لكن المعركة دي كانت نقطة فاصلة خلت كفة المسلمين بقيادة عمرو بن العاص هي الكفة الأقوى في الحرب.

مشاهير عاشوا فيها:

عين شمس عاش فيها ناس كتير مهمين زي عمر مكرم الإمام والزعيم الشعبي العظيم وكمان الشاعر أحمد شوقي اللي اتأثر بيها وهو في المنفى وذكرها في قصيدته اللي وصف فيها حنينه لمصر وقال:

وهفا بالفؤاد في سلسبيل ظمأ للسواد من عين شمس

وكمان اتولد فيها عدد كبير من الفنانين والمطربين المشهورين على الساحة دلوقتي، ده غير عدد كبير من الرياضيين.

أفكار خاطئة عنها:

فيه أفكار كتير غلط عن عين شمس زي مثلا إن ناس كتير فاكرة حي عين شمس حي عشوائي لكنه حي كبير ومنظم وفيه طرق وشوارع كتير، كمان عين شمس مش مجرد منطقة صغيرة حوالين حدود محطة المترو اللي فيها، بالعكس دي من أكبر المناطق في القاهرة لأن فيه مناطق كتير حواليا تابعة ليها علشان كده لو رايح هناك لازم تسأل كويس عن العنوان اللي إنت رايحه، وكمان هي منطقة محورية سهل توصل منها لكل طرق ومحافظات مصر وكمان سهل توصل منها لأي مكان جوه القاهرة.