وترجع تاني يا زمن العجايب تبخل
وتمنع قلب دوبته جمال فرحة سنين
طال انتظارها معاك….
وتقسم قسمة الظالم
وتضرب كل احلام الهنا بالحيط
وتجمع لي الهموم مكاتيب
وتطرح مالحساب
قلبي اللي نبضه فداك؟!!
اكونش يا دنيا ..
مديونه لطوب ارضك
بنبضات الهنا والفرح
وسدادها وجب بالامر
وضروري ياخدني هناك؟!!
عالاتراح وأواجعها
أنادم قصة الحرمان
وارضى بالبكا والنوح على حلمي
واشوف اخر طريق عمري ضياع وهلاك!!
خلاص مش عاوزة
من شهدك ولا عسلك
ولا طمعانه في الجيات
تجيب لي نصيبي في التركة
اللي موقوفه على صدمات
تكسر في السنين اكتر
وتقول للقلب باتحداك…..
سيبيه للغير؟؟ ما انيش عاوزاه.
وهاحلف لك على الختمه :
ما نيش هاطمع يكون لي نصيب ..
ولكن اوعى…
تأذي جمال مرسوم
على جبين السنين بالحنا والجاوي
عشان تنتقمي من شخصي الضعيف امله
وابصم لك على عهدي .
كفايه على اتطلع لنجمه في السما يلالي
وادعي له بقلب ملاك….
وربي ما عاوزة منك غير:
تسلم سكته ايديكي.
وتحفظ عمره وتصونه.
وتبعد عنه كل رجيم
يعكر صفو ايامه
ويبدل فرحته اهه
تقطع جو روح الروح
.وتعلم علامه بوشم
يحلف له باني مستحيل انساك…
يا دنيا. مرة ردي لي الدعا اجابات.؟
وخلى جمالك الطاهر يعيش للغير.
سليم. هادي. ويهدي للجميع خيره
سنابل حب بزرعها
بجمال نور العيون السودا وصفاها
اللي مش شكاك…
واما ان كان على قلبي..
فانا عارفه…
هاطيب خاطره بهدااااوة واقوله:
يا قلبي يا مسكين.
منين عاوز تكون في الدنيا مالفايزين؟!
وتسعد بالجمال كله وتخزي العين؟!.
كفايه عليك …
كفاية عليك في يوم قالك
بضي عيونه وحنانها : انا باهواك…!!
بقلمي عبيرالصلاحي
من ديواني ( تعال اما اقولك)
