من بعد الوحدة اللي خدتني من نفسي سنين
والفرحة اللي ما شُفت طريقها ولا عارفه منين
قضّيت م العمر سنين ياما عايش وحداني
في الآخر ربك عوّضني عوض الصابرين
عوّضني أكيد يعني بأغلى وبأجمل نعمة
عوّضني بقلب مافيش زيُه كان زي النسمة
نسّاني معاه كل ألامي وجراح الماضي
وبإيده أكيد خد بإيديا من عز الأزمة
حاسيت وكأن الروح رجعت ليا من تاني
من بعد سنين عايش فيها مهموم وبعاني
لا أنا عارف إيه طعم الفرحة ولا شايف بابها
ماشي ومش عارف خطاويا على فين وخداني
كانت أيامي من قبلك مش راضية تفوت
عايش طول ليلي ونهاري دايماً في سكوت
والدنيا في عيني كانت سودة ولا ليها ملامح
ويوماتي قاعد مع نفسي وبستنى الموت
جيت إنت بقُربك حلّيت الأيام في عينيا
نسِِّتني العمر اللي أنا عِشته قبلك وحديا
وعرِفت معاك طعم الفرحة وإزاي حَسّتها
وحاجات والله أكيد قبلك مافاتتش عليا
أنا بحمد ربي على وجودك والله و بشكُر
إداني اللي حلمت أنا بيه والله وأكتر
لو يعني حاولت إن أنا أوصف إحساسي بقُربك
ف أنا مهما أكيد أوصف يعني مش هعرف أعبّر
بقلمي عبدالحميد وهبه
