بقلم / نهي احمد مصطفي
الحياة مليانة مواقف صعبة وأوقات بنحس فيها إن الدنيا واقفة ومش هتتحرك. ساعات نحزن من فُقد، أو نتعب من ضغوط، أو نحس إن المشكلة أكبر من طاقتنا. لكن الحقيقة إن الوقت عنده قدرة عجيبة إنه يغير كل حاجة.
الجرح اللي بيبكيك النهارده، بكرة هيبقى ذكرى علمتك درس. المشكلة اللي شايفها نهاية العالم، بعد فترة هتكتشف إنها كانت خطوة لشيء أفضل. حتى الفرح نفسه بيمشي مع الوقت، وده علشان نتعلم إن الحياة مش ثابتة، وإن كل لحظة، سواء حلوة أو صعبة، هتمشي وتسيب مكانها للي بعدها.
المهم في وسط ده كله، إننا نتمسك بالأمل، ونفكر إن “لا شيء يبقى على حاله”. الضيق له نهاية، والليل مهما طال لازم ييجي وراه فجر جديد.
فلو إنت بتمر بأزمة دلوقتي، صدّق إن الوقت هيكون معاك، وهيعدي اللي مضايقك، ويمكن يسيبلك حكمة أو قوة عمرك ما كنت هتكتسبها من غير التجربة دي.
سيمضي كل شيء مع الوقت، وما يبقاش غير اللي اتعلمناه من رحلتنا
