بقلم شريف شحاته مصر
في السيرك حاجات ياما عجيبة حركات مدروسة والعاب
ونعيش لحظات حلوة غريبة من غير ما بنسأل أسباب
.أراجوز يتنطط في زريبة يحكي المعاناة ويا عذاب
فقر وأمراض تانية مريبة بيقولها لناس خلف سراب
في السيرك
ودة واحد بارز عضلاته بالحبل بيربط غلبان
بالضرب يسمعنا أهاته والتاني بيقبل يتهان
ومغني بنسمع حكاياته بيقول مواويل مع أهات
يحكي مأساة جوة حياته كلنا عايشينها بضحكات
في السيرك
ودة راجل ماسك كرباج قدامه أسود عاجزة عليلة
لو شافه بيزأر أو هاج يجلده علشان نفسه ذليلة
وتعبان طالع مع حاوي منزوع منه كل سمومه
مش عايز يلدغ ولا ناوي وكأنه أرنب من يومه
في السيرك
بهلوان يمشي علي حبال والناس تتعجب من فنه
شايل فوق كتفه جبال ويداري أحزانه وهمه
وفي الآخر الناس بتروح والسيرك بيرحل لبلاد
وأهو عالم ماشي بيطوح سيرك يلاعب في عباد
