ـــــــــــــــــــــ
هو….
أيامى مجرد حرف فى عيونك
أنا طاير على كونك
أنا عاشقك ومجنونك
ولو عايزانى أعيش ليكى
ولا يهمّك
أنا اللى نقشت من إسمك
حروف تتهجّى فى مشاعرك
ولو ترضى بـ قلبى حبيب
هخلّى دمايا من مهرك
ياأجمل عشق
شفته فـ دنيتى الحلوة
عيونى ف السما غنوة
تقول لك لو تحبينى
هاضحى بروحى وسنينى
واكون ليكى يادوب خدّام
واكون عاشق بأحلى غرام
حبيبتى صوتها ف الأحلام ينادينى
حبيبتى خدينى قوام لشريانك
مكان القلب ده مكانك
وساكن فيه
هى……
ياساكن قلبى من جوّا ياشريانى
عيونى تعشقه بقوة
ماليش غيره بديل تانى
وانا ولا حول ولا قوة
غير الحب سلطانى
وبسأل نفسي…يانفسى
يجوز بحلم
وخايفة افوق من احلامى
تقولى حبيبتى لاء ده يقين
ده عشق القلب ويّا العين
لقيتك حب قوّانى
وصبرنى وخلانى
ادوق لحلاوة الأيام
نسيت جرحى وأحزانى
أمانه ياجرح ماتعدّيش
ولا تيجى ف وديانى
زرعت القلب جناين ورد
لآدم اللى أهدانى
رحيق الجنة ف الدنيا
ده حبه بجد شيئ تانى
/ يامنه اليمنى
