تخيلوا لو البلد دى ماكانش اتدق فيها مسمار ولا اتعمل فيها مشروع واحد جديد من بعد يناير ٢٠١١ مقابل ان الفلوس كلها تتحط فى بطننا واكلنا وشربنا وبس
تخيلوا منظر العشوائيات وهى كبرانة عشر اضعاف النهاردة
تخيلوا اللى يسوى واللي مايسواش من قوى الشر هاجم علينا او بيهددنا او بيحدف صاروخ على دماغنا النهاردة لولا شراءسلاح وصرف المليارات عليه
تخيلوا قعدتنا فى الضلمة ويمكن على شمعة ولمبة جاز النهاردة
لولا بناء اكبر محطات كهربا فى الشرق الاوسط بشراكة سيمنز الألمانية
تخيلوا اننا لسه بنركب القطارات وهى متهالكة ومتكسرة لحد النهاردة وبعضها خارج عن الخدمة اصلا
لولا النهوض بالسكة الحديد
و احضار اسطول قطارات جديدة
تخيلوا حال الموانى والمطارات وهى على قديمه ..حالتها اللى ما تسرش حد لو لا البناء والتطوير
تخيلوا منظر الشوارع والطرق وهى مكسرة ومدحدرة وزحمة فوق بعضها لحد النهاردة لولا بناء الكبارى ومد الطرق
تخيلوا اهاليكم فى الريف وهم عايشين وسط المجارى الطافحة والمياه القاطعة النهاردة
لولا اتعمل مشروع حياة كريمة ووصل لحد عندهم
تخيلوا طوابيركم وزحامكم ووقفتكم على رجليكم عشان تطلعوا شهادة من السجل المدنى او تجددوا رخصة
تخيلوا بهدلتكم لحد النهاردة وسط الزحام عشان تشتروا رغيف عيش او تغيروا انبوبة بوتجاز
لولا ان المنظومة اتصلحت واتطورت
تخيلوا اهلكم وحبابيكم اللى كانوا مصابين بفيروس سى لو ماكانوش اتعالجوا بالمجان كان زمانهم النهاردة وصلوا لمرحلة الفشل الكبدى وسرطان الكبد لا قدر الله
تخيلوا لو كل حاجة فضلت خربانة وتلفانة زى ما استلمها بعد يناير ٢٠١١
تخيلوا ان فى فلوس ازيد شوية فى جيوبكم بس بيتكم الكبير خربان وتلفان وحياتكم اصلا غير ادمية وعيونكم مكسورة من اعداءكم او متاكل حتة من ارضكم زى جيرانكم كان ده هيبسطكم اكتر ؟!
تفتكروا !
معتقدش
