كلمة هقولهالك وإسمعني وخلّيها سر
عمر اللي يحب ما هيفكّر لحبيبُه يضُر
حتى إن جه يوم وإنقطعت العشرة ما بينهم
هيحاول يوصل بيه يعني على أقرب بر
صدّقني الحب اللي ما بينهم ده لوحده كفيل
يشفع لحاجات حصلت بينهم فعلاً ويشيل
أفكار لو كانت مش هي وردت في خيالهم
ف رجوعهم تاني لبعضيهم أكبرها دليل
على أقرب بر أكيد واجب ياخد بإيديه
لجل إنه يحافظ ع الوعد اللي إتافقوا عليه
والخير اللي أكيد كان واضح دايماً في عينيه
صعب إنه في يوم فعلاً يعني يتحول شر
كلمة هقولهاك وإسمعني وخلّيها سر
كلمة هقولهالك بصراحة وخلّيها معاك
الحاجة اللي إنت حاببها هتكون وياك
والعين اللي بتحلم دايماً إن إنت تشوفها
صدّقني أكيد قبل ما تحلم هتكون شايفاك
فيه ناس من قبل ما نتكلّم أوحتى نبوح
نلاقيها بدون ما بتستأذن سكنت في الروح
لا تفارق روحنا ولا هوانا وفي كل مكان
ومعانا أكيد جوه قلوبنا منين ما نروح
مين اللي يحب ويتمنى لحبيبه أذاه
أو إنه يشوف دمعة في عينه وجراح جواه
بالعكس اللي بيعشق واحد يفديه بالروح
ويبيع الكون لجل عيونه ويتمنى رضاه
الحب أكيد عمره ما كان نسبة وتناسب
ولا مين مغلوب يعني في حبه أو مين الغالب
الحب إزاي نفضل دايماً ع العهد ما بينا
حتى إن بعدنا أكيد نفضل أصحاب وجبايب
