فيه وجع ما بيتقالش وجع ساكت بيمشي جوا الروح زي النار الباردة لا بيحرق الظاهر بس بيولع جواك من غير صوت
تعيش بيه كأنه جزء منك تصحى تلاقيه معاك تنام وهو لسه قاعد في صدرك ما بيمشيش ولا بيريح
وجع ما تعرفش تشكيه لأنك لو نطقت بيه هتوجع اللي بتحبهم ولو سكت عليه هتتوجع لوحدك
تضحك قدام الناس تمزح وتبان بخير وكل اللي حواليك بيصدقوا الصورة اللي رسمتها
يقولوا ده ما فيهوش حاجة ضاحك وسعيد
بس محدش يعرف إن وراك ليل طويل مليان تفكير وبكاء مكتوم مليان كلام ما اتقالش علشان ما يوجعش حد
كل كلمة بتخاف تقولها بتتحول لوجع جديد وكل لحظة بتكتم فيها نفسك علشان ما تبينش تعبك بتسيب فيك أثر ما بيتنسيش
فيه ناس بتشوفك دايما قوي وده أكبر غلط
هما فاكرين إنك جبل بس ما يعرفوش إن الجبل ده بيتآكل كل يوم من جوه وإنك لما بتسكت مش عشان ما عندكش كلام لأ عشان الكلام لو خرج ممكن يهد اللي حواليك
اختارت الصمت مش ضعف لكن رحمة
اختارت تضحك علشان اللي بتحبهم ما يشوفوش كسرك لأنك مش قادر تشوف حزنهم بسببك
وفي كل مرة بتقول أنا كويس أنت بتكذب علشان تطمن الناس اللي مش فاضيين يسمعوا الحقيقة
كل مرة بتقول ما فيش حاجة بتدفن وجع جديد جوه قبر اسمه الصبر
تضحك في وش الدنيا والدنيا نفسها عارفة إنك بتتوجع بس سايبك تمثل لأنك اخترت الطريق ده
ولما الليل ييجي وتخلص الضوضاء بتقعد لوحدك وتسمع نفسك اللي محدش بيسمعها
تبص للسقف وتقول جواك هو أنا ليه كده ليه محدش حاسس بيا
بس بعد شوية تهدى وتفتكر إن في رب فوق شايفك عارف كل حاجة سامع الوجع اللي فيك حتى وانت ساكت
هو الوحيد اللي بيشوف الحقيقة اللي الناس مش شايفاها والدموع اللي بتبلعها علشان ما تكسفش حد والضحكة اللي بتخبي بيها كسر قلبك
وتعرف إن كل وجع ليه آخر وإن اللي بيتوجع في صمت بيكافئه ربنا براحة ما يحسهاش غير اللي تعب بجد
هييجي يوم وهتضحك من قلبك لا علشان تخبي ولا علشان تطمن حد
لكن علشان خلاص ربنا مسح الوجع اللي كان جواك وبدلك سكينة تخلي كل اللي فات يهون
فما تندمش إنك سكت، ولا تلوم نفسك إنك خفيت وجعك
اللي بيحس بالناس أكتر هو أكتر واحد بيتألم بصمت
وإنت واحد من القليلين اللي وجعهم مش بيكسرهم بل بيصنع منهم ناس أنضج أحن وأصدق من كل اللي بيضحكوا بغير سبب
