بقلم شريف شحاته مصر
أحزان وهموم في كل الدنيا وكأن العالم بقي غابة
أطفال بتموت ونفوس غالية بتروح وناس تانية غلابة
ولو ناس تتمني الحرية بتشوف أهوال وسط خرابة
أرواح بتضيع من غير دية وما بنسمع غير الندابة
آه ياني
ودة شحط علي راس أكبر دولة بيقول حقلب شرق جحيم
مبسوط من القهر ومن ذلة وكأنه شيطان وحش رجيم
ومعاه شحط تاني يشبه خلة مجنون في العقل وما سليم
نكسر ورا موته ميت قلة من عدل وفضل رب رحيم
آه ياني
مش طايق أنا أتابع شاشة ولا أشوف أهوال وسط مآسي
ولا أسمع أفكار ناس هشاشة تماثيل واقفة زي كراسي
وواحدة بترقص زي فراشة ويتوه عقلي ويصبح ناسي
وأفلام عايزة ناس حشاشة لا فيها وعي ولا كياسة
آه ياني
ودة واحد طالع فرحان بيقول أخبارنا الفنية
الناس مش ناقصة توهان ولا ناقصين عقول وحشة غبية
أو عالمة بتعرض فستان والأفضل تلبس جلابية
أعمل إيه أنا زهقان إمتي نشوف ريح حرية
آه ياني
