كلمات زكيه فيصل
مدرستنا ياجميله فيكي أحلي الذكريات
كانت أجمل أيام لينا فيكي من عمر فات
كفر البراموان الابتدائيه كانت مدرستنا
فيها درسنا جرينا لعبنا وحلمنا بالأمنيات
كانت أحلامنا بسيطه كنا أبسط من البساطه
كنا نرسم ع الحيطان ولا حتي ع البلاطه
لما صدفه نلاقي حتة طباشير ع الأرض مرميه
كنا نحلم اننا نمسك طباشيرة ملونه طبيه
ونكتب علي السبورة ونلون بالألوان
ونكتب عليها دروسنا ونقف نشرح كمان
كان المدرس قدوتنا ونتمني نكون زيه
نحترمه ونقدره ومقامه كان متصان
أول ماروحنا المدرسه كنا بيها فرحانين
مدرسه كفر البرامون الابتدائيه بنات وبنين
كل حد فينا جواه ذكريات محفوظه
ياااااااااا شوفوا كنا فين وبقينا فين
مكنش في لانش بوكس ولا برجر ولا بانيه
لكن كان السندوتش معمول بحنيه ودا أحلي مافيه
من إيد ست الكل الغاليه
وتودعنا بحضن حنين كل شئ كانت بتحليه
ونروح ننده علي أصحابنا وناخد إيدنا في إيدين بعضنا
نمشي نسمع نشيد خدناه أو نقرأ في كتاب ربنا
علشان لما نروح للشيخ سيد نطلع حافظين
كنا عيال كنا جُمال كنا بنضحك من قلبنا
كنا بنفرح لما نلاقي الدنيا بتمطر
ندعي ونقول يارب كتر كتر
نجري ونلعب تحت المطرة
نروح نلاقي الأكل سخن ومتحضر
ناكل ونروح نتدفي في وسط لمه العيله
والنور يقطع نعمل ركيه نار واللمه جميله
كل واحد يحكي حكايه أو فازورة وعايز الحل
الدفا كان في اللمه الحلوة مش ببطانيه تقيله
مدرستي كفر البرامون الابتدائيه
أوقاتها كانت بالسكر متحليه
القلب كان فيها سعيد فرحان
أجمل واحلي الأيام في عنيا
زكيه فيصل
