قلوبنا مهما بتقدم فروض الصدق والاخلاص
بتلقى كفة النكران في الاخر تقوم زايدة!!
ما فيش فايدة…
لا احنا بنتعظ مالغدر ولا بننفخ في صهد الوصل
ونحاذر باشواقنا اللي مش لافة ولا دايرة
ولا عارفة تكون باردة!!
ما فيش فايده..
نكدب في الهوى عيوننا ونكتم صوت عقول راجحة
عشان نوهم نفوسنا وبرده نتالم بصوت مكتوم.
ونرفض في القصاص دية هوى قلوبنا اللي متعاهدة..
مافيش فايدة…
سؤال حاير ومش لاقي الاجابة الشافية لجراحنا واوجاعنا ودمعه نفس مقهورة من الخذلان وقاعده جنب حيط العمر مذعورة ومتاخده!
ده كله ليه؟!..
وهي قلوبنا وقت الصدق محتاجه من الاكاذيب ومالالاعيب تحط التاتش وتزين نفوس هربانه مالوحدة؟!!
ده طول الصبر علمنا بان الدنيا مهما تعطي بخلانه
ومهما نخوض بحور المال ونطلع درجة التتويج
ونلبس تاج من الشهرة ومالاحساب ومالانساب.
ومهما تحوز ايدينا كنوز
ومهما ننول ومهما نفوز
نلاقي نفوسنا فى الاخر لده زاهدة!!
وغاية قلبنا المسكين
يلاقي الفرحة وتطبطب على حلمه عينين صادقين
تضلل عاللي عدى وراح
في سكة نصلها دباح
وتوهب له الوفا قناطير من الاشواق
نيرانها رغم ريح البعد
يلقاها الحنين قايدة..!
تعالوا نصون دفا نفوسنا ونتحوصل.
. ونقفل كل ابواب الهوى المكسورة ترابيسها
ونرضى بالنصيب الاعرج
ونتعكز على حالنا
لان حقيقي مش فاضل
في روحنا حيل لمشاكسة ولا مناهدة..
وشكرا يا اللي رمتوا لنا شباك الوهم
مليانه من الاكاذيب
ما يكفينا سنييين وسنبيين
..ويعطينا الدروس دمعات
بتغسل ذل ايامنا اللي جرحتنا
باشواككم وكانت عالالام شاهدة..
بقلمي عبيرالصلاحي
من ديواني تعالى اما اقولك
