مالك سرحان كده ومبلم
وعيونك بصة على الحيط
إنطق فضفض وإتكلم
وإندب حظك لو حبيت
قلبك كان بالفطرة مسلّم
ورميت روحك جوه احضانهم ما لقيت
غير جرح ورا التانى فيك بيعلّم
وأنت اللى ياما عشانهم ضحّيت
ورسمت فى خيالك حلم
صحيت منه على واقع ف أتخضيت
إنهض وجراحك قوم لملم
و خطى فوقها وأفرح إنك عديت
درس يا صاحبى من 100 درس
وهتشوف ياما غيره دروس
ما هى دنيا بتفرم فينا
قاسية ومليانة تروس
و الضربة اللى تعدى بتقوينا
فأستقوى وانهض يلّا ودوس
دوس وأبدأ من أول تانى
ليه تسلّم وتعيش محبوس
سكوتك معناه على نفسك أنت الجانى
ودا شيء ظاهر جدآ محسوس
أنا حاسس بيك جداً جداً
من غير ما تنطق بأى حروف
واضح فى ملامحك وف عينك ساكن
قلق طافح على حبة خوف
أنا عارفك مستغرب لكن
قوم بص فى مرايتك شوف
وأنكش جواك هتلاقى
جروح فى الروح لما تطوف
داوى اللى ينفع اما الباقى
قول كان ماضى و الأن محذوف
أنا شوفتك مرة عرفت ما بيك
اما اللى شافوك عادى ف سلامة الشوف
تعليق واحد على “مالك”
راءع وأكثر دام المداد مغداقا