أنا عِشت سنين فاكر إني م الحب أنا أقوى
مش عارف إنه ساعات ممكن يوصل على سهوة
فكّرتُه بيحتاج لمناقشة وحوار وخلافُه
أو إنه بيحتاج لمعاينة ودراسة جدوى
أتاريه موجود دايماً يعني ومالوهش أوان
وبييجي في أي زمان فعلاً وف أي مكان
وبيدخل جوة القلب بدون أي إستئذان
حاجة ممكن يعني نسميها ميكروب أو عدوى
أنا عشت سنين فاكر إني م الحب أنا أقوى
أنا عِشت سنين عامل فيها على قلبي حِصار
عايش مع نفسي ومتأقلم ليل ويّا نهار
أول ما الحب وصل قلبي وخبّط على بابُه
حاسيت بإني ضعيف جداً ولا ليا قرار
كان بتهيألي إن ماحدش كان ممكن يقدر
إنه يخلّيني في يوم فعلاً في الحب أفكّر
فيه حاجات لو وصلت لقلوبنا أو سِكنت فيها
م الصعب أكيد يعني عليها إن إحنا نسيطر
مهما هتتظاهر وكأنك كده صاحب مبدأ
وإن مافيش حد في يوم حتى ممكن يتجرأ
بإنه يقرّب من قلبك أو حتى يفكّر
هتلاقي اللي هيخطف روحك وف ثانية هيسرق
والأدهى أكيد فعلاً إنُه أول ما يقرّب
بتحس حاجات جوة القلب كأنها بتكهرب
واقف في مكانك متثبّت وكأنك عاجز
مش عارف تبعد صدّقني ولا قادر تهرب
بقلمي عبدالحميد وهبه
