بقلم د/إلهام حسنى
في وسط الكلام الكتير والضجيج اللي بقى حوالينا في كل مكان فيه حاجة بسيطة قوي لكنها نادرة… حاجة ممكن تغير حياة حد بكلمة أو بنظرة أو حتى بسكوت صادق…
الحاجة دي اسمها: التعاطف.
مش دايمًا الناس محتاجة نصيحة، ولا حل ولا حتى دعم مادي.
أوقات بيكون كل اللي محتاجاه إن حد يحس بيها… يفهم هي بتوجع من إيه… ويسيب لها مساحة تعيط أو تتكلم أو حتى تسكت جنب حد حاسس بيها
يعني إيه تعاطف؟
التعاطف مش مجرد شفقة.
ولا مجرد إنك تقول ربنا يعينك وتمشي.
ولا إنك تحكم وتقول: أنا لو مكانك مكنتش هتصرف كده.
التعاطف هو إنك تعيش المشهد بعين اللي فيه… تحس بمشاعره… تتقبل ضعفه… وتدي له أمان.
التعاطف هو إنك تحط نفسك مكان اللي قدامك مش علشان تنتقده لكن علشان تفهمه.
وإنت فاهم تقدر تحس ومع الإحساس ييجي اللطف والرحمة والاحتواء.
أمثلة من الحياة البسيطة:
ابنك رجع من المدرسة مدايق ومش عايز يتكلم.
بدل ما تقوله: في إيه بقى؟ كبر بقى واتكلم
جرب تقول له: أنا شايفك مش على بعضك أنا هنا لو حبيت تحكيلي… مش مستعجلة.
زوجك داخل تعبان وساكت بدل ما تفترضي إنه متغير معاكي
جربي تقولي: حاساك مضغوط النهاردة… لو حبيت تتكلم أنا جنبك.
صديقتك بتمر بفترة صعبة وبتكرر نفس الشكوى
بدل ما تقولي: أنتي بتلفي في دايرة قولي الحمد لله بقى
جربي تقولي: أنا شايفة وجعك… وعارفة إنك بتحاولي حتى لو الدنيا مش بتتحرك بسرعة.
في كل موقف اللي قدمتيه مش كلام… قدمتي قلب. وده هو التعاطف.
أنواع التعاطف:
1. تعاطف عاطفي:
إنك تشعر بنفس الإحساس اللي عند الشخص اللي قدامك. تبكي معاه أو تتألم لوجعه.
2. تعاطف معرفي:
إنك تحاول تفهم تفكيره وتشوف الأمور من منظوره.
3. تعاطف سلوكي:
يعني تقدم فعل بسيط: حضن لمسة كلمة طيبة أو حتى وجودك في صمت جنبه.
وكل نوع فيهم له وقت وله تأثير كبير.
ليه التعاطف مهم؟
لأنه بيريح القلب.
بيخلي الشخص يحس إنه مش لوحده.
بيساعد في العلاج النفسي وبيربط العلاقات برباط إنساني قوي.
وبيحمي المجتمع من القسوة واللامبالاة والتجريح اللي بقى كتير حوالينا.
أحيانًا الشخص بيتغير لمجرد إن في حد حس بوجعه وما حكمش عليه.
إيه اللي بيمنعنا نتعاطف؟
الخوف: بنخاف نفتح قلوبنا فنتجاهل مشاعر غيرنا.
الاستعجال: عايزين نخلص أي حوار بسرعة.
الحكم: بنقيم ونصدر أحكام أسرع ما نحاول نفهم.
الفتور العاطفي: اتعودنا على الجفاف وبقينا نقول كل الناس تعبانة.
لكن الحقيقة؟ كل واحد وجعه مختلف حتى لو ظاهرنا متشابه.
والتعاطف عمره ما كان ضعف…
دي قوة اللي قلبه صاحي.
(بنت الحلم الكبير)
