في حياتنا، بنقابل ناس كتير وندخل في علاقات مختلفة: صداقة، زواج، شغل، وحتى علاقات عائلية.
لكن بين كل ده، فيه شيء لو غاب… بيخلي كل علاقة مهما كانت شكلها جميلة من برة، جوها فاضي وبارد.
الشيء ده هو الأمان العاطفي.
الأمان العاطفي مش كلمة في كتاب، ومش نصيحة بنسمعها وننساها، ده إحساس بيغذي الروح. هو إنك تكون قادر تحط قلبك قدام الشخص اللي قدامك من غير خوف إنه يجرحه.
هو إحساس إنك مسموع ومفهوم، وإن مشاعرك مش حاجة هيتسخر منها أو تتحكم ضدك.
تخيل معايا… طفل صغير بيرجع من المدرسة متضايق لأنه اتخانق مع صاحبه، ولما يروح لأمه، بدل ما تقول له: إنت بتعيط على حاجة تافهة، تقول له: أنا حاسة بيك، أكيد الموقف ضايقك، تعال نحكي.
الفرق بين الردين مش بس فرق في الكلام، لكن فرق في إحساس الطفل بنفسه، وثقته إن مشاعره لها قيمة.
في العلاقات، الأمان العاطفي بيظهر لما:
تقدر تعبر عن رأيك حتى لو مختلف.
تتكلم عن خوفك وضعفك من غير ما حد يستخدمه ضدك.
تغلط وتتأكد إن الغلط مش نهاية العلاقة، لكن فرصة للتعلم.
الأمان العاطفي مش بس بيحافظ على العلاقة، لكنه بيخليها تزدهر. هو اللي بيخلي الكلام الحلو حقيقي، والضحكة طالعة من القلب، والحب ثابت حتى في أصعب الأوقات.
(بنت الحلم الكبير)
