يا عم يا جزار
يا بايع اللحمه
العقل خف وطار
واشتقت للفخده
قربت أدوخ وانهار
والمعده مش ساكته
تعبانى ليل ونهار
ماسكالى ع الواحده
أدِّيها فلفل حار
تزعل وتتشَكَّى
أوسلطه فيها خيار
بتقولى مش واكله
وماسكه فى الممبار
وانا ممعييش فكه
حقيقى انا محتار
هاتلى الرجول حتى
واهو شوربة الممبار
أعمل بها بالفته
واجيبلى ربع خضار
و اشمِم الحِته
أنا بيتى آيد نار
وجيرانى اهى شاهده
تعبت م الأفكار
وهاموت انا بسَكته
طب شوفلى وِئَه طحال
أعملها بالدمعه
أو تُمن لحم جِمال
إن شاللا م اتسَوَّه
يسِد بُق عيال
ويمصه فى العضمه
عيالى جالها هبال
أرجوك انا ف أزمه
والبت بنتى نوال
على زعلى دايما عازمه
مشيلانى جبال
بكلام ملوش لازمه
و حتى عندى جَمال
بقى شاب فى الجامعه
بانصح يمين وشمال
وودانه مش سامعه
ما هو برضو عقل عيال
هيموتوا ع اللحمه
انا قرشى كله حلال
بس الظروف ماسكه
ان كان علىَّ انا راضى
أتعشى فول وزبادى
بس العيال اولادى
ملهومش فيه دعوه
و الواد حسام مقموص
ولاويلى راخر بوزه
بيقوللى عضمه ف صوص
مبقولش عايز موزه
أو حتى دهن فصوص
مش كبده م المحجوزه
ينفع معايه غموس
ويسد وقت العوزه
حاسس محمد ناوى
يطلب أجيبله عكاوى
عملت فيها الحاوى
وقلتله ما تساوى
شبعنى لومه حكاوى
وسمِعت منه بلاوى
بيقول يابابا انا غاوى
ونفسى طالبه مشاوى
مبقيتش عارف أرد
على حد منهم خالص
حقيقى حاجه تخض
ومن ساعتها انا لايص
قربت يعنى أعُض
الجوع غلبنى وقارص
ابعتلى طيب كرشه
واهو سعر على أدى
أسلُقها انا ونتعشى
واهى ليله وتعدى
أهى يعنى مش وحشه
و بكره الكريم يِدِّى
أكله خفيفه وحرشه
والمعده راح تِهدا
عيالى جالها كساح
وعضامها صارت هشه
وانا جيبى مش مرتاح
مكنوس وبمقشه
إن روحت اجيب تفاح
يقولولى لأ لحمه
يا عم يا جزار
استعمل الرحمه
الفقر طعمه مرار
وواولادى مش فاهمه
أنا مش كلامى هزار
يا بايع اللحمه
وخفف الأسعار
وابعت كِيسين لحمه
Khayry Nassef
