بقلم:منارفريد
من قرية شنواي بالمنوفية خرجت حكاية مش شبه أي حكاية، حكاية اتكتبت بحروف الوجع، وختمها القدر بنهاية ماكنش حد مستعد لها.
محمود وعبد الرحمن
اسمين كانوا دايمًا ييجوا سوا، لدرجة إن اللي يشوفهم لأول مرة يفتكرهم إخوات من بطن واحدة، مش مجرد أصحاب.
كبروا مع بعض خطوة بخطوة، ضحكة بضحكة، حلم بحلم. من وهما صغيرين، ماكانوش يعرفوا طريق غير اللي ماشيين فيه جنب بعض.
لما كبروا، ما فكروش يسيبوا بعض.
قرروا ينزلوا يشتغلوا سوا في البحيرة، وقالوا: “إحنا في الغربة لبعض”.
نفس العربية، نفس الطريق، ونفس الأمل في بكرة أحسن.
لكن في لحظة…
لحظة واحدة بس، الطريق خان، والعربية عملت حادثة، واتقلبت الدنيا.
الخبر نزل كالصاعقة: 3 أرواح راحت…
وكان من بينهم محمود وعبد الرحمن.
عاشوا سوا، تعبوا سوا، حلموا سوا…
وحتى في المـ ـوت، ما رضوش يفارقوا بعض.
صحبة عمر ما فرقهاش شغل، ولا غربة، ولا طريق صحراوي قاسي…
ولا حتى النهاية.
اللهم ارحمهم رحمة واسعة، واجعل مثواهم الجنة بغير حساب،
وصبّر قلوب أهاليهم اللي فقدوا أولادهم،
وأصحابهم اللي فقدوا سندهم،
وقريتهم اللي صحيت على وجع عمره ما هينسى.
رحمكم الله يا من علمتمونا أن الصُحبة الحقيقية قد تمتد… حتى آخر الطريق.
