حكاياتنا مع الدنيا

بقلم/نشأت البسيوني

كل واحد فينا ليه حكاية مع الدنيا فيه اللي عاشها بحلوها ومرها وفيه اللي اتلسع من نارها وفيه اللي لسه بيحاول يفهمها ومش قادر يعرف هي ماشية على أنهي مزاج الدنيا يا صاحبي مش دايمه لحد ومفيش حد فيها بياخد كل حاجه ومهما فتشت عن الكمال مش هتلاقيه لأن النقص هو اللي مخلي للفرح طعم أوقات كتير بنفتكر إن الحياه ظالمانا وإننا بنشيل فوق طاقتنا بس مع الوقت بنفهم إن الوجع كان درس وإن الخساره كانت خيره وإن البعد كان رحمه كل حاجه بتحصل لينا ليها سبب حتى اللي وجعك النهارده ممكن يكون هو اللي أنقذك من بكرا أصعب في ناس تعدي في حياتك زي النسمة تسيب أثر جميل وتختفي وناس تسيب فيك جرح ملوش دوا وناس تفضل في قلبك رغم البعد والمسافات الدنيا بتعلمنا مين الحقيقي ومين كان لابس وش بتورينا وشوش ماكناش نصدق إننا هنشوفها على حقيقتها بس برضه رغم كل ده لازم نحمد ربنا لأن الوجع بيصفي والسنين بتغربل ومفيش حد بيتظلم في ميزان ربنا الحياه مش سباق ومش منافسه مع الناس هي رحله رحله بنقابل فيها ضحك وبكا فرح وخساره بداية ونهاية لكن دايما اللي بيكمل هو اللي قلبه نضيف ولسه عنده أمل أصل اللي جوه قلبه خير عمر الدنيا ما تكسره حتى لو وقعته ألف مره بيرجع تاني واقف كأنه ماحصلش حاجه في لحظات بتحس فيها إنك خلاص تعبت ومش قادر تكمل بس تفتكر إنك عديت قبل كده حاجات أصعب فتبتسم وتقول لسه ليا عمر في الحياه الحياه مش دايمه والأيام بتجري أسرع من ما نتخيل فخلي بالك من قلبك من كلامك من الناس اللي بتحبك خليك دايما طيب حتى لو اتقابلت بقساوه خليك مبتسم حتى لو الوجع مالكك وخليك راضي حتى لو الحياه ضيقت عليك وفي الآخر لما تهدى وتبص حواليك هتعرف إن الحياه ما كانتش ضدك هي كانت بتربيك بتقويك وبتجهزك للي جاي كل خيانه علمتك متديش ثقتك بسرعه وكل فراق خلاك تعرف مين بيستحق تبكي عليه ومين لأ وكل وجع خلاك تحس بطعم السلام لما ييجي تحس بالفرحه لما تلاقي راحه البال اللي كنت بتدور عليها الدنيا مش سيئه يا صاحبي إحنا اللي بنشوفها من زاويتنا الضيقه بس لما نتعلم نرضى ونسيبها تمشي على سجيتها هنكتشف إن ربنا كان دايما بيدبرها صح حتى وإحنا مش فاهمين خليك دايما مبتسم خليك صبور خليك متفائل وافتكر دايما إن حكاياتنا مع الدنيا هي اللي بتخلي حياتنا تستحق إنها تروى