بقلم الكاتبة والشاعرة
حنان فاروق العجمي
هو انتَ مين؟
عشان تستقوى
وفاكرني غَدوَة
يا دوب خِلصِت ف يومين
قُل لي انتَ مين؟
الطَّيِّب اللي كنت بستحمل ضعفُه
أخدت روحي وضيعت عُمري سنين
طب قُل لي بس انتَ مين؟
الكداب اللي خدعني أبو وشِّين؟
معقول مَكُنتش أعرف!
إنَّك تِعبان بِتلدغ مرتين!
مَثِّلت ازاي قُل لي؟
إنك مستقيم والشَّر كان جواك دفين!
ازاي ضحِك عليَّ؟
قولولي يا مؤمنين
هو انتَ مين؟
وفين سجادة صلاتك؟
إزاي زَوَّرت إنك أمين؟
قل لي ريحني انتَ مين؟
هان عليك عذابي
واللحن دا لَحَّنتُه فين؟
قل لي انتَ مين؟
وسجنتني ليه ف وهم انُّه كُله ليكي؟
ليه سيبتني لبعدين؟
ليه ضيَّعت روحي؟
ليه بقسوة يسيل دم جروحي؟
ليه ينكتِب عليَّ أعيش الأنين؟
قل لي انتَ مين؟
وقلبك ازاي طاوعك تضَيَّع حياتي؟
وتسرق مني ذكرياتي
تقتل قلبي اللي عاش معاك حزين
قل لي انتَ مين؟
ليه وقع اختيارك عليَّ؟
ليه اخترتني الضحية؟
ليه سرحت بخيالي؟
ليه دبحتني بإديك الاتنين؟
قل لي انتَ مين؟
الغِل دا كان جواك من إمتى؟
السواد من سنين مش من يومين
لا يُمكِن أنسى
ولو دفنتك تحت التراب
حقي ف رقبتك ليوم الدين
قل لي انتَ مين؟
ولا عيش ولا ملح ولا شَربِة ميَّة
نُكران وجحود يمَوِّت
كل كلامك كدب
الأرض والسما عليك شاهدين
قل لي انتَ مين؟
وتعِبت ليه وبنيت بإديَّا جدران متلوِّنين؟
لا عِشت فيهم بأمان
ولا سيبتلي براءتي اللي صدَّقِتَك
بقوا كل الناس عندي خاينين
قل لي انتَ مين؟
ودموعي اللي نِشفت؟
ازاي أحس تاني إن الدنيا للبني آدمين؟
أحلامي اللي تاهت
والصحرا اللي جوايا
بتبكي وتصرُخ
ازاي تزرع فيها جدور من تاني
خايفة ليتحولوا شياطين
قل لي انتَ مين؟
يا دراما ماسخة
وعنيَّا ازاي عنَّك كانوا عاميين؟
يا قدر اتكتَب وحاولت أغَيَّرُه
ووقِعت ف جُحر التعابين
قل لي انتَ مين؟
يا أناني معملش فيَّ حاجة
حطِّني في خانة الله يرحمها
وجَعتِني على نفسي
خلتني مَثَل للمضحوك عليهم والمظلومين
قل لي انتَ مين؟
وازاي كُنت بتنام وضميرك ساكت؟
ولا يوم أَنِّبَك ولا فكَّرَك
كانت هنا واحدة أخدت فرحتها
حرمتها من هدوء بالها وراحتها
جلدتها بسوط مسموم
استكتَرت عليها النسيان
خليتها تعيش كما الميِّتين
قل لي انتَ مين؟
م الجن انتَ ولَّا أرذل قرين؟
ملازمني ليه؟
حرَّرني كفاية ضلمة بتُخنقني
سيبلي شمعة أنوَّر بيها عتمة طريقي
أبعِد وأحاول أرسم جديد
أخطِّي على أرض صلبة
عايزة أخرج من كهف ابتلائي
لكوكب تاني لعالم تاني
أتوِلِد مخلوق ما عاش زماني
ولا أفتِكر كان فين مكاني
والقصة تبقى عبرة
درس لكل المخدوعين
ويفضل سؤالي
هو انتَ كُنت مين؟
